"É practicamente imposible atopar a cativa"

O capitán do buque oceanográfico Ángeles Alvariño que está Burela por descanso, Antonio Álvarez, falou este mércores cos seus compañeiros, que lle transmitiron pola mañá que prevían abandonar a zona de rastrexo na que traballan en Tenerife para tratar de localizar a pequena Anna, de 1 ano, debido á dificultar de achar o seu corpo. "É practicamente imposible atopar a cativa; pensan que se saíu da bolsa", dicía o patrón. Con todo, pola tarde confirmáronlles que seguirían con esa misión uns días máis por orde expresa de La Moncloa.

As forzas de seguridade xa se despediron da tripulación e retornarán a bordo. O capitán de Celeiro, José Manuel Guerreiro (na foto), que fixo a substitución de Álvarez confirmouno: "Non o deixamos... seguimos". "Querían seguir buscándoa e tiñan ilusión por atopala, pero é moi difícil", lamenta Álvarez. De feito, na mañá do mércores os seus compañeiros comentáronlle que "se soubésemos que iamos atopala quedariamonos máis tempo". 

O Ángeles Alvariño seguiu o rastrexo co robot mergullado na mañá. Antonio Álvarez pensa que logo de 40 días no "mar é difícil que poida saír á boia. O corpo puido estoupar coa presión, é difícil se non saíu aos sete ou dez días do afundimento".

O Ángeles Alvariño aprazará así uns días o seu regreso a Cádiz para proseguir as campañas de observación de túnidos en Mallorca, financiadas con fondos europeos. A súa misión na zona comezou o pasado 30 de maio. Este mércores produciuse unha nova substitución de tripulantes, incorporándose sete. Álvarez ve poucas posibilidades de que cando se marchen da zona, continúe a procura, "porque non hai outro barco que teña eses medios, único se o Estado contrata un estranxeiro e lle paga".