O presidente da Generalitat, Ximo Puig, asegurou no seu discurso de toma de posesión que asume "a voz do pobo" que lles pide "cambio, xustiza e igualdade" e que quere que o seu mandato supoña "a recuperación do poder dos cidadáns e un goberno ao servizo das persoas".
Tras prometer o seu cargo ante o pleno das Cortes Valencianas e converterse no sexto presidente da Generalitat valenciana da etapa autonómica, Puig realizou unha "proposición" sobre o seu programa de goberno, que non foi obxecto de debate e coa que concluíu a protocolaria sesión plenaria de hoxe.
Na súa alocución, na que alternou o valenciano e o castelán, asegurou que comparece "para cumprir a promesa de lealdade ao pobo valenciano" e agradeceu a confianza dos deputados e "as conviccións", "o esforzo" e "as esperanzas" dos valencianos, que lles abriron as portas "dun novo tempo".
Dixo que quere que o seu mandato supoña "un cambio fundamental: a recuperación do poder por parte dos cidadáns e un goberno ao servizo das persoas" e, para iso, dixo que estará presidido pola rexeneración ética, a loita contra a desigualdade, unha cultura potente e un "novo contrato social que modernice a educación, a sanidade e os servizos sociais".
Foron testemuñas da súa toma de posesión o ministro de Asuntos Exteriores, Jose Manuel García-Margallo; o secretario xeral do PSOE, Pedro Sánchez; o expresidente do Goberno José Luís Rodríguez Zapatero; o secretario xeral de UGT, Cándido Méndez, e o exministro Ángel Gabilondo, así como a familia (muller e fillos) do presidente.
