O presidente do Goberno de Canarias, Paulino Rivero, reiterou hoxe o seu rexeitamento aos proxectos de privatizar o 49% de Aena e afirmou que "o Estado non pode silenciar nin desentenderse do carácter estratéxico, básico, dos aeroportos en territorios como Canarias".
Rivero fixo esta afirmación nun artigo que inseriu no seu blogue de internet ante a decisión de onte do Consello de Ministros de España de aprobar unha operación pola que a participación pública en Aena se reduciría ao 51%. Un artigo onde o presidente autonómico sostén que hai "razóns de peso para que o Estado acceda á esixencia de Canarias de xestionar ou coxestionar os seus aeroportos, tal e como recolle o seu Estatuto de Autonomía".
Os aeroportos son "un alicerce básico para Canarias, para os canarios e a nosa actividade económica", polo cal "estamos claramente en contra de calquera privatización porque, no caso das illas, é un servizo básico e imprescindible, que require garantías e melloras", argumenta. Rivero detalla que xa expresou esa oposición á propia ministra de Fomento, Ana Pastor, nunha chamada telefónica que lle fixo tras o Consello de Ministros para comunicarlle a decisión adoptada.
Esta decisión rexéitase desde Canarias, di, porque "reforzarnos como destino turístico non pasa por privatizar un servizo esencial, senón por mellorar a operatividade e rebaixar as taxas", afirma o presidente insular, que apostila: "Deixar o servizo en mans de empresas que só atenden ao criterio de rendibilidade non é o camiño".
Por todo o exposto, Rivero conclúe que "os canarios van pagar a privatización de Aena", co argumento de que "é un erro" porque supón "deixar en mans do interese unicamente empresarial a xestión dos aeroportos" nun territorio onde "esas instalacións constitúen un servizo esencial". "Aos canarios sairanos moi cara a privatización de Aena", sentenza como final do seu escrito.
