O presidente do Goberno en funcións, Pedro Sánchez, mostrou este martes ao líder de Unidas Podemos a vontade de iniciar conversacións para conformar un "goberno de cooperación", un punto de partida co que se mostrou satisfeito Pablo Iglesias, que insiste en que Podemos entre.
O secretario xeral de Podemos resumiu así aos xornalistas o encontro que mantivo durante pouco máis dunha hora con Pedro Sánchez para intentar solicitar o apoio á investidura, para o que Podemos pide formar parte dun goberno con representación proporcional, de acordo cos seus 42 deputados. "Propuxéronnos empezar a traballar por un goberno. Goberno conxunto, de cooperación, de coalición... é o de menos. O importante son os contidos, construír un goberno plural para afrontar os grandes retos deste país", manifestou Pablo Iglesias tras reunirse co presidente en funcións.
Porque, á marxe do nome proposto polo PSOE, para Podemos o máis importante é que o Executivo sexa "plural" e que ambas as forzas estean representadas de forma proporcional. "Para nós un goberno conxunto é un goberno conxunto, póñaselle o nome que se lle poña", insistiu o líder de Podemos, que remarcou que "unha maioría social progresista quere vernos colaborando e gobernando xuntos".
A partir de agora, haberá reunións máis discretas para ir dando forma ao que Pablo Iglesias espera que se traduza nun acordo de goberno conxunto e progresista para afrontar desafíos sociais". A reunión deste martes transcorreu nun "ton positivo", segundo puxo de manifesto Iglesias, que se mostrou convencido ademais de que non haberá vetos por parte do PSOE aos nomes que propoña Podemos no eventual "goberno de cooperación" que ambos os grupos comezarán a negociar.
Preguntado sobre se está disposto a integrar a independentes nese goberno, en lugar da cargos do partido, Pablo Iglesias insistiu en que "hai dúas posibilidades, unha que Pedro Sánchez negociase con Rivera e con Casado... ou un acordo connosco". "Non houbo ningún veto. A época dos vetos acabouse. Non concibo que o PSOE poña encima da mesa ningún veto, nós non o fariamos", insistiu Pablo Iglesias, que se mostrou convencido de que se camiña na boa dirección.
A portavoz socialista no Congreso, Adriana Lastra, pola súa banda, subliñou este martes a disposición do PSOE e de Unidas Podemos para alcanzar un acordo e defendeu o "goberno de cooperación" como a mellor fórmula de entendemento.
En rolda de prensa tras a reunión entre Pedro Sánchez e Pablo Iglesias, Lastra asegurou que "non se falou de nomes" neste encontro, ao ser preguntada por se os socialistas aceptarían a entrada de ministros de Podemos.
Pero si recordou que PSOE e Unidas Podemos non suman maioría, e apuntou que para o que hai disposición por ambas as partes é para chegar a un acordo que leve a un Goberno de cooperación que sería "plural, aberto, integrador, incluínte e representativo das distintas sensibilidades". O importante, recalcou, son as "grandes coincidencias programáticas" e a "vontade de acordo" que ambos os partidos teñen, e niso é no que se está traballando.
