O presidente do Goberno, Pedro Sánchez, recibirá este martes pola tarde na Moncloa ao secretario xeral de Podemos, Pablo Iglesias, nunha reunión á que a formación morada vai con esperanzas de lograr "avances" na negociación dun "executivo conxunto" co PSOE. Fontes de Podemos confirmaron a Efe a reunión, que se celebra "a petición de Sánchez" antes da súa viaxe a Xapón deste mércores ao cume do G-20.
Desde a formación morada afirman que acoden a esta reunión, que avanzou La Sexta, co obxectivo de pedirlle a Pedro Sánchez que lles aclare cal é exactamente a súa posición actual respecto da formación de goberno, dado que nos últimos días escoitaron "mensaxes moi diversas" e "posicións contraditorias" expresadas polo PSOE.
Esta fin de semana os socialistas recordaron a Unidas Podemos que Sánchez xa se moveu da súa posición inicial de gobernar en solitario, coa súa oferta do goberno de cooperación, e agora tócalle ao líder do partido morado facer o mesmo e renunciar á súa aspiración de gobernar en coalición.
Desde Podemos trasladaranlle este martes ao presidente en funcións a conveniencia de devolver "as conversacións ao ámbito da mesa de negociación" fóra da lóxica da "partida de ping pong" nos medios de comunicación, segundo informan a Efe desde esa formación.
O presidente do Goberno en funcións, Pedro Sánchez, recibiu o pasado luns no Palacio da Moncloa ao líder de Unidas Podemos nunha reunión na que non se produciron avances concretos e da que as formacións saíron coas posicións "moi afastadas" porque, segundo o PSOE, Iglesias seguíalle reclamando un goberno con ministros da súa formación.
A reunión deste martes é a cuarta que se produce entre ambos tras as eleccións xerais do pasado 28 de abril. A primeira tivo lugar o pasado 7 de maio na Moncloa, e nela ambos os dirixentes constataron a súa vontade de chegar a un acordo estable para a lexislatura, aínda que Pablo Iglesias sempre puxo como condición que sexa cunha coalición.
"A baldosa é xullo e nesa baldosa vaise bailar", explican de forma gráfica na contorna do presidente, onde descartan a primeira semana de xullo, pola súa proximidade co G20 de Xapón e o posterior Consello Europeo en Bruxelas, que empezará o 30 de xuño pola tarde e alargarase previsiblemente ata o 1 de xullo.
