O pleno do Senado aprobou este mércores a Lei de Cambio Climático e Transición Enerxética coa inclusión de emendas —presentadas por Ciudadanos— que modifican o polémico artigo (18.4) relativo ás concesións no dominio público marítimo terrestre co fin de aclarar que non haberá efecto retroactivo. Agora o texto devolverase ao Congreso dos Deputados para culminar a súa tramitación lexislativa, antes da súa remisión definitiva ao Boletín Oficial do Estado.
Nun recente informe, o Consello Consultivo de Galicia concluíu que este artigo da Lei de Cambio Climático era inconstitucional ao considerar que afectaría tanto aos prazos de duración das concesións —e das prórrogas outorgadas— antes de que a norma entre en vigor como tamén á validez dos actos administrativos que se ditaron" ao amparo da normativa anterior.
Esta cuestión provocou que a Xunta anunciase que recorrería ao Tribunal Constitucional se non se modificaba o texto, pois considera que ten como fin limitar a duración das concesións da Lei de Costas, cunha derrogación do prazo de ata 75 anos de prórroga extraordinaria, e, ao seu xuízo, a posta en risco do sector mar-industria galego. Precisamente, esa palabra de "ditado" é a que se cambia agora na emenda aceptada no Senado coa redacción de que se diten tras a entrada en vigor" para matizar que non haberá efectos rectroactivos.
O texto, co apoio de todos os grupos salvo a negativa de Vox e a abstención do PP, será remitido ao Congreso para a súa aprobación final
Respecto diso, o coordinador dos socialistas galegos no Senado, Xoaquín Fernández Leiceaga, destacou que a aprobación desta emenda serve para "despexar calquera sombra de dúbida" que puidese haber sobre a retroactividade da norma, que se refira aos "actos que se diten" e non "aos ditados".
Nun comunicado, o socialista galego remarca que ningunha lei ten efectos retroactivos, pero opina que agora se exclúe calquera sospeita. Por todo iso, asegura que o sector pode ter "total tranquilidade".
Outra das emendas de Cs aceptadas pasa por matizar que, no caso das instalacións industriais, ese prazo de duración do título de concesión comezará a contar desde o inicio da actividade industrial para a que se concedeu ese permiso, no canto de facelo desde o otorgamiento da concesión.
O texto aprobouse no Senado co apoio de todos os grupos parlamentarios, excepto o de Vox, que votou en contra, e o PP, que finalmente se abstivo. No Congreso dos Deputados, PP e Más País abstivéronse, mentres que na Cámara alta o PP mantivo a súa abstención e Más País decantouse finamente por apoiar a lei.
No entanto, malia o maioritario apoio, todos os grupos da oposición criticaron que o proxecto lexislativo tramitouse polo procedemento de urxencia, de modo os senadores apenas contaron con 14 días para presentar e analizar 585 emendas, un prazo que, dada a "importancia" e "transcendencia" para o futuro do país, algúns senadores cualificaron canto menos de "insuficiente".