A Policía Nacional detivo este mércores 16 persoas entre elas a un sobriño do presidente da Generalitat, Quim Torra, e dous alcaldes da CUP, acusados dun delito de desordes públicas por cortar as vías da Ave en Xirona o pasado 1 de outubro. Fontes policiais aseguran que o operativo segue en marcha e non se descartan novas detencións.
Entre os arrestados pola mañá, atópanse dous alcaldes da CUP das localidades de Verges, Ignasi Sabater, e Celrà, Dani Cornellà. Xa pola tarde, a Policía Nacional detivo outras cinco persoas, entre elas un fotoxornalista e Ernest Morel Torra, sobriño do president da Generalitat. Todos eles quedaron en liberdade con cargos.
Morel Torra foi como número cinco da CUP nas eleccións muncipales de 2015 en Santa Coloma de Fernès (Xirona).
Os feitos que se lles imputan remóntanse ao día 1 de outubro do pasado ano cando un grupo, composto por unhas catrocentas persoas, accedeu pola forza ás instalacións de Adif na estación da Ave de Xirona.
Este grupo de persoas logrou interromper por espazo superior a dúas horas o servizo de alta velocidade co consecuente prexuízo para os viaxeiros e alterando gravemente o tráfico ferroviario habitual. O motivo esgrimido polos concentrados foi a conmemoración do primeiro aniversario da celebración do referendo ilegal do día 1 de outubro de 2017.
A Brigada Provincial de Información de Barcelona iniciou as primeiras investigacións para poder identificar, e no seu caso deter, aos máximos responsables que participaran activamente nos feitos ao tratarse dunha infraestrutura considerada "crítica" do Estado.
