As sete capitais do Antigo Reino de Galicia repiten, como cada domingo da Infraoctava do Corpus, a ofrenda a Jesús Sacramentado na catedral de Lugo, única galega co privilexio de manter exposto o Sacramento de forma permanente. Trátase dunha ofrenda que se repite desde 1669 e que este ano, por quenda, correspondíalle presentar á cidade de Santiago de Compostela. Farao finalmente a de Mondoñedo. Con estas dúas e Lugo, tamén participan as cidades de Betanzos, A Coruña, Ourense e Tui.
A ofrenda é presentada por un representante municipal, habitualmente o respectivo alcalde, e respondida polo bispo que lle corresponde a esa localidade. Neste 2015 danse varias peculiaridades: o oferente de quenda anunciou que non estará presente, apelando á laicidade, e quen tomará o seu lugar, Mondoñedo, está sen bispo titular desde finais de maio.
