Ángel María Villar, presidente da Federación Española de Fútbol (RFEF), e Rafael Louzán, presidente en funcións da Deputación de Pontevedra e presidente da Federación Galega de Fútbol (FGF), inauguraron este mércores o novo campo de Coia, en Vigo.
A reforma integral do campo, cofinanciada por ambas as institucións, incluíu a renovación total do terreo de xogo, a iluminación, os vestiarios, as bancadas e os aseos.
"Estamos na cidade con maior número de licenzas de Galicia e por iso queremos darlle esa colaboración que os clubs de Vigo merecen", afirmou Louzán, quen recordou que o investimento total ascenderá a dous millóns de euros, dos cales o ente provincial achegará o 60 por cento e a RFEF o 40 restante.
O presidente en funcións da Deputación recordou que tamén está prevista a construción dun edificio nos arredores do campo de Coia no que se situará a nova sede da delegación territorial da FGF, no cal se investirán 600.000 euros que sairán "integramente" do orzamento da RFEF.
"Este edificio vainos a permitir concentrar os distintos locais que ten alugados a Federación Galega aquí en Coia. A licenza xa está solicitada no concello de Vigo, polo que as obras empezarán máis ou menos en setembro", explicou o dirixente da FGF.
Ao acto tamén asistiron o presidente do Celta de Vigo, Carlos Mouriño, e o alcalde da cidade, Abel Caballero, quen demandou "unha maior presenza" da RFEF en Vigo, así como a construción de "un segundo campo" no futuro.
Coia xa ten novo campo de fútbol
Abel Caballero, o alcalde de Vigo, reclamou un segundo estadio. A nova sede da delegación territorial da Federación Galega de Fútbol (FGF) construirase nos arredores