Unha colisión entre dous turismos na tarde deste venres na OU-801 deixou a dúas persoas feridas, unha delas embarazada, no concello ourensán de Pontedeva. Segundo a información recollida no 112 Galicia, ás 18:00 horas, dous coches chocaron á altura do punto quilométrico 19, ao paso pola parroquia de Trado, despois da ponte do río Deva. A consecuencia do impacto, dúas persoas sufriron lesións de diversa consideración, polo que foron atendidas polos profesionais de Urxencias Sanitarias de Galicia-061. De feito, un equipo médico acudiu ao lugar do accidente a bordo do helicóptero con base en Ourense co fin de axilizar os traslados.
Igualmente, necesitaron da colaboración dos axentes da Garda Civil de Tráfico para organizar a circulación e facilitar a actuación dos equipos sanitarios. Convén destacar que este operativo se activou grazas ás chamadas das testemuñas do accidente e dun dos propios implicados na colisión que, na súa comunicación co 112, indicou que entre os feridos había unha muller embarazada, aínda que estaban todos liberados e accesibles.
ACCIDENTE EN OÍMBRA. Media hora despois, tamén na provincia de Ourense, unha saída de vía na OU-1013 mobilizou aos equipos de urxencia ata o concello de Oímbra para atender aos ocupantes do vehículo sinistrado. ás 18:30 horas, o 112 Galicia recibiu a chamada dun particular que solicitaba axuda para o condutor dun turismo que non era capaz de abandonalo polos seus propios medios tras saírse da vía.
Así, os xestores do 112 pasaron aviso ao persoal sanitario e aos Bombeiros de Verín que, nada máis chegar ao lugar, fixeron uso do material de excarceración para liberar ao ferido. Deste xeito, o condutor puido ser evacuado ao centro hospitalario de referencia polo equipo de Urxencias Sanitarias de Galicia-061. Ata o lugar tamén acudiron os axentes da Garda Civil de Tráfico.
