Adega, contra a ampliación do matadoiro de Castro de Rei polo impacto ambiental que supón

A asociación ecoloxista Adega alegou contra a ampliación do matadoiro de aves do Grupo Sada P.A Castela-Galicia S.A. en Castro Ribeiras de Lea, no municipio lucense de Castro de Rei, polo impacto ambiental que sufriría a zona de protección de infraestruturas e de protección de augas de dominio público na que está situado.

O proxecto, cuxa posta en marcha foi anunciada no Diario Oficial de Galicia do 20 de xuño, carece dun estudo específico e detallado sobre as emisións de partículas e gases contaminantes producidos en distintos períodos climáticos, segundo denunciou Adega nun comunicado. Así mesmo, os ecoloxistas destacaron que a empresa está situada en chan rústico, non urbano, e lamentaron que a ampliación implicará "duplicar a produción actual, polo que se dobrarán os efectos negativos".

A asociación incidiu en que o incremento dos residuos afecta "severamente" á auga do río Lea, e reclamou que se especifique o tratamento que se fará ás ao redor de 4.700 toneladas de residuos que se producirán.

Por iso,  o grupo ecoloxista solicita á Administración que someta a avaliación do impacto ambiental o proxecto por medio dos trámites específicos, co fin de emendar os problemas sinalados no proxecto polos ecoloxistas.

Comentarios