Os ecoloxistas de Adega criticaron o Plan de Conservación "á carta" que a Xunta de Galicia prevé aprobar para preservar un espazo ambiental único e cinco veces protexido como o humidal A Frouxeira, unha lagoa salgada xunto á praia do mesmo nome, na costa coruñesa.
"O plan dá a razón a Adega nas súas denuncias e corrobora o mal estado do humidal", expón a Asociación da Defensa Ecolóxica de Galicia nun comunicado remitido hoxe, no que indican que tanto eles como outras entidades ambientalistas xa pediron ao Goberno galego a retirada do borrador actual a fin de redactar outro plan "aberto e participativo".
A asociación ecoloxista galega apunta a que as "reiteradas aperturas artificiais do lago" colmaron o vaso de auga, alterando "a súa estrutura, diversidade e funcionamento ecolóxico".
Para os ecoloxistas, o Plan de Conservación da Frouxeira, comprometido polo Goberno ante o Parlamento galego a partir da apertura dunha canle artificial sobre a área autorizado pola Xunta a finais do 2009 e polo que practicamente se desecou o humidal, carece de rigor "científico" e presenta "serias deficiencias que imposibilitan a conservación con medidas xeneralistas".
Reprochan que este plan, publicado o 23 de novembro do 2013 e en fase de tramitación para a súa aprobación final, non inclúe un estudo hidrolóxico e que opta "por unha xestión á carta, subordinada aos intereses urbanísticos e recreacionais para xustificar as aperturas forzadas, deixando en segundo plano a conservación dos seus valores naturais".
