Adega denuncia que as batidas de lobos derivan en "calamidades" como a ocorrida en Friol

A asociación ecoloxista Adega denunciou ante a Fiscalía especializada en medioambiente do Tribunal Superior de Xustiza de Galicia (TSXG) que as autorizacións de caza do lobo incumpren as condicións legais en Galicia.

Segundo Adega, "está a darse unha incorrecta execución" da normativa vixente, e, en consecuencia, está "a causar un prexuízo ambiental e ecolóxico a esta especie, menoscabando a protección da fauna e flora máis singular" de Galicia.

No comunicado subliña que "no proceder da Administración nesta cuestión podería haber suficientes indicios dun delito de prevaricación administrativa, conforme ao artigo 404 do Código Penal".

Na súa denuncia ante a Fiscalía do TSXG, Adega indica que achega "argumentos que proban de que se estarían ditando resolucións para controis poboacionais de lobo de forma discrecional, cun claro propósito de favorecer unha actividade cinexética que a Lei de Caza limita ostensiblemente".

O colectivo engade que na nova lexislatura a Consellería de Medio Ambiente incrementou as autorizacións para controis, ben con batidas ou con agardas, "derivando algunhas nunha auténtica calamidade como o recente caso de Friol, no que morreu un can".

Para rematar, Adega considera que a Administración galega "non fixo o suficiente" para xestionar o control poboacional do lobo e que, ademais, "fallou" nos incentivos e apoios e na posta en marcha de medidas de prevención, así como no pago "áxil" dos danos a agricultores e gandeiros.

Adega sostén que sobre os controis poboacionais "existe unha literatura científica xeneralizada que indica que este tipo de medidas drásticas provocan un efecto contrario ao que pretende".

Neste sentido, conclúe que a destrución ou alteración da particular estrutura social que marca as pautas de comportamento dos lobos que viven en grupos familiares, "incrementa os ataques a presas fáciles, das que o gando ocupa unha posición preferente".