Alberto Núñez Feijóo, a María Jesús Montero: "¡Que morro e que cara!"

A Xunta de Galicia prepara a vía para reclamar o Ive
Alberto Núñez Feijóo.LAVANDEIRA JR. (Efe)
photo_camera Alberto Núñez Feijóo.LAVANDEIRA JR. (Efe)

O presidente da Xunta, Alberto Núñez Feijóo, indicou que o seu Goberno está a articular os pasos a dar para responder á decisión de Goberno que dirixe Pedro Sánchez de non pagar ás comunidades as contías derivadas da mensualidade do Ive de decembro de 2017, á vez que censurou a actitude do Executivo, co foco na ministra de Facenda, María Jesús Montero. 

"¡Que morro e que cara!", dixo o presidente galego tras recordar que se comprometeu con el "solemnemente" en 2018 a buscar unha solución para transferir ás comunidades os 2.500 millóns que o Goberno debe por este concepto —uns 200 millóns a Galicia—. "E agora dinos que non, que o diñeiro é seu", reprobou. 

Preguntado acerca de se, neste contexto, a Xunta presentará un recurso ante os tribunais, Feijóo non quixo entrar en detalles, pero si deu a entender que traballa para atar os argumentos legais cos que poder combater a decisión do Executivo. 

"Cando teñamos a decisión ganduxada, dirémolo. Cando teñamos algunha noticia que dar, darémola. Non nos gusta improvisar. Se está adecuadamente argumentada farémola pública de inmediato", sinalou, antes de advertir que o que non vai facer a Xunta é "rir as gracietas" do Goberno central. 

Comentarios