Adif Alta Velocidade completou estes días diferentes percorridos con trens a velocidade máxima como parte da fase de probas do sistema de freado e seguridade ERTMS do tramo Pedralba de la Pradería-Ourense, correspondente á liña do Ave galego. Foi a primeira vez que trens Ave circularon a 300 quilómetros por hora en Galicia.
As probas incluíron "percorridos de persecución, con dous trens circulando pola mesma vía e no mesmo sentido, mantendo a distancia de seguridade, así como circulacións en paralelo, no mesmo sentido e en sentido contrario", detallou Adif. Segundo o administrador ferroviario, este período de ensaios está planificado co obxectivo marcado de posta en servizo do tramo Pedralba-Ourense, a fronteira de Galicia e Zamora, "antes da finalización do ano 2021".
As probas, que se realizan por ambas as vías e en ambos os sentidos entre Sanabria e Ourense, comprenden un tramo duns 128 quilómetros en horario nocturno para non interferir no servizo ferroviario comercial.