A Axencia Tributaria incorporou un novo patrulleiro polivalente de altura, o Condor, que iniciará os seus labores "de xeito inmediato" co obxectivo de loitar contra o contrabando e o narcotráfico. A súa inauguración e entrega formal produciuse no marco dun acto celebrado este xoves en Moaña, ao que acudiron numerosas autoridades.
A falta dos traballos finais de posta a punto, que esperan rematar "de forma inmediata", durante os primeiros meses de operación o barco permanecerá na base de Vigo; aínda que a idea é "situalo nas zonas nas que en cada momento se estime necesario en función da evolución do narcotráfico".
No transcurso do acto, que tivo lugar na sede do estaleiro construtor, Rodman, o director xeral da Axencia Tributaria, Jesús Gascón, subliñou que co Condor a flota do Servizo de Vixilancia Aduaneira da Axencia Tributaria pasa a contar cun total de 47 embarcacións e refórzase na loita contra o narcotráfico.
"Na loita contra o contrabando, e en especial contra o narcotráfico, a cooperación é unha peza crave", apuntou a continuación, antes de desexar que este patrulleiro, "exemplo de innovación", consiga moitos "éxitos".
Pola súa banda, o presidente de Rodman, Manuel Rodríguez, destacou que a construción deste buque representa "un fito" para o estaleiro. Así, entre as particularidades coas que conta, puxo en valor o "novo" sistema de estabilizadores que mellorarán a estabilidade do buque, o seu rendemento e a súa seguridade.
Tras estes discursos, procedeuse á entrega da patente de navegación (que autoriza a navegar baixo un determinado pavillón e lexitima ao capitán para efectuar os seus labores) e posteriormente outorgouse a bandeira á xefa da embarcación, que foi izada mentres soaba o himno nacional.
"SATISFACCIÓN" DA MADRIñA. A continuación interveu a madriña do patrulleiro. Trátase da secretaria de Estado de Facenda e presidenta da Axencia Tributaria, Inés Bardón, quen mostrou a súa "satisfacción por constatar que o sector empresarial galego" foi "capaz de resistir a situacións complicadas" como a actual pandemia de covid-19.
Logo de eloxiar que o naval é quen de "situarse ao máis alto nivel", referendou a "importancia dos estaleiros da Ría de Vigo e de Galicia" e trasladou o apoio do Estado a este sector.
Acto seguido, celebrou a entrega e posta en servizo do Cóndor por ser un "exemplo e símbolo da loita contra o contrabando", un obxectivo co que a Axencia Tributaria está "absolutamente comprometido". "Non sospeitaba que amadrinaría un barco; é ilusionante e unha honra para min", finalizou.
CARACTERÍSTICAS TÉCNICAS. O barco, que supón a introdución dun novo segmento de embarcación na flota do Servizo de Vixilancia Aduaneira, requiriu aproximadamente dun ano para a súa construción, por máis de 8,2 millóns de euros. A súa habilitación permítelle levar a bordo a un máximo de 22 persoas —14 tripulantes, 4 invitados e 4 detidos—.
O director adxunto de Vixilancia Aduaneira, Ángel Delgado, explicou aos medios de comunicación que o Condor ten 43 metros de eslora, velocidade máxima de 23 nós e unha autonomía de máis de 2.000 millas náuticas, co que dobra a dun patrulleiro convencional (equivalería a ir desde Vigo ás
O buque está dotado coa última tecnoloxía, o que inclúe modernos sistemas de comunicacións, navegación e motorización (con dous motores de 4.000 cabalos en total). Ademais, conta con dúas embarcacións semirrígidas, que son baixadas ao mar e subidas a cuberta mediante uns pescantes, particularidade que "faio adecuado para, nun momento determinado, rescatar a persoas".
Así mesmo, este patrulleiro dispón dun sistema "potente" de loita contra incendios, que poderá empregar tanto para asistir a embarcacións cun lume declarado a bordo, como en situacións nas que a tripulación dos barcos intervidos incendien a embarcación con intención de afundilos ou queimalos para eliminar probas.
