O BNG e o PSdeG pediron "explicacións inmediatas" á Xunta pola vacinación contra o coronavirus da conselleira delegada en España da multinacional de residencias privadas de persoas maiores DomusVi, Josefina Fernández. A deputada nacionalista Olalla Rodil pide ao presidente do Goberno galego, Alberto Núñez Feijóo, que aclare "como é posible que esta empresaria do grupo que xestiona o maior número de prazas privadas de residencias de maiores" en Galicia e o seu irmán "acabasen nunha lista de vacinación sen ser colectivo prioritario". Na mesma liña, o vicesecretario xeral do PSdeG, Pablo Arangüena, tachou de "insulto á cidadanía e aos falecidos nos seus centros" que a directiva sexa inmunizada a pesar de non formar parte do persoal asistencial da compañía.
Fernández foi vacinada pola Xunta o pasado 8 de xaneiro nun dos centros que a compañía posúe en Vigo e pouco despois recibiu a segunda dose, conseguindo con iso a inmunización completa, segundo publica o portal dixital Diario.es. Rodil considera nun comunicado que Feijóo debe dar "explicacións inmediatas" desa situación, xa que "saltáronse todos os procedementos establecidos no plan de vacinación".
A propia Xunta de Galicia recoñece que Josefina Fernández e o seu irmán Pedro, que é o director da zona Galicia sur da compañía, recibiron a vacina durante o mes de xaneiro na residencia DomusVi Vigo. Segundo confirman desde a Consellería de Política Social, ese centro incluíu na lista dos seus traballadores para ser inoculados á súa conselleira delegada, "que non figuraba inicialmente na relación de persoal que manexaba a Xunta". E o mesmo sucedeu co seu irmán.
A Administración entende que DomusVi "interpreta que ambos forman parte do equipo da residencia e que deberían ser vacinados", pero, en calquera caso, remite ás "explicacións pertinentes" da compañía.
DomusVi, pola súa banda, argumenta que "a razón detrás" desta vacinación é que tanto á conselleira delegada como o seu irmán están "a visitar centros de DomusVi por todo o país", en contacto "constante" con residentes e empregados, polo que "os médicos recomendáronlles vacinarse".
REACCIÓNS. A nacionalista Olalla Rodil considera que "é responsabilidade da Xunta garantir que as vacinas chegan seguindo escrupulosamente os plans de vacinación" e "neses plans ningunha empresaria nin irmán son colectivo prioritario". A viceportavoz da formación nacionalista cualifica de "simplemente indecente" a vacinación e advirte ao Executivo galego de que "non pode tirar balóns fóra e facer como que isto é un problema da empresa".
Engade que, tras a alcaldesa da localidade de Boimorto, María Jesús Novo, do PP, agora é unha empresaria a beneficiada con esa inmunización "mentres nin sequera hai data para comezar a vacinar ás traballadoras e persoas usuarias do servizo de axuda ao fogar deste país que, como todo o mundo sabe, forman parte dese colectivo prioritario de grandes dependentes que hai en Galicia".
Pola súa banda, o socialista Arangüena considerou "escandaloso" que Fernández, á que se refire como "amiga de Feijóo" e como directiva dun "imperio xeriátrico" reciba esta vacina e recalcou que "non é persoal asistencial, senón alta directiva e millonaria accionista".
