A portavoz nacional do BNG, Ana Pontón, propuxo este luns un "confinamento de quince días" se a terceira onda de contagios non remite proximamente.
En rolda de prensa, Pontón insistiu en que as medidas "brandas" que se están adoptando recentemente "non están a ser efectivas" en tanto que "non se logra aplanar a curva" e a presión hospitalaria está a incrementarse.
A líder nacionalista solicitou "que se faga todo o necesario e se tomen medidas valentes sen descartar ningunha", porque aínda que "a ninguén lle gusta falar de confinamento, porque é unha medida moi dura, hai que polo sobre a mesa se os datos non reflicten unha melloría".
"Deben barallar esta alternativa porque estamos nun momento crítico" e as medidas que se están tomando "de nada serven se non cumpren o seu obxectivo a curto prazo", sentenciou Pontón, que remarcou que "non hai dilema á hora de elixir entre economía e saúde", xa que medidas duras pero efectivas serían menos prexudiciais para a economía que as medidas brandas.
De feito, incidiu no "desastre" que supuxo o "enfoque economicista de salvar a Nadal", que o que fixo foi disparar unha terceira vaga e un pico de contaxios.
Con todo, para a líder nacionalista "é posible un confinamento co sistema educativo funcionando" e con mecanismos que permitan "saír a pasear sen que supoña un risco".
Ana Pontón recordou que en Galicia xa houbo un confinamento "con cifras de contaxios moi inferiores" ás deste momento, polo que é momento de que a Xunta "poña sobre a mesa" esta opción.
Na súa opinión, a situación "non se pode resolver apelando á responsabilidade individual", chamando ao autoconfinamiento, xa que se de verdade crese que a solución é un confinamento o responsable é pór sobre a mesa ese debate".
XINZO. O Concello ourensán de Xinzo de Limia, do PSOE, propuxo adiantar o toque de queda ás oito da tarde e que os comercios pechen ás seis da tarde para tratar de reverter o aumento de contagios da covid-19 tras as datas do Nadal.
Esta formulación prodúcese despois de que o Goberno central haxa anunciado este domingo que vai recorrer o acordo de Castela e León de adiantar ás oito da tarde o toque de queda, unha decisión que lamentou a Xunta, que o mantén en vigor.
O Concello anunciou tamén o peche das instalacións deportivas e dos parques infantís así como a suspensión de todas as actividades culturais e deportivas e recomenda as vías telemáticas para todas as xestións non imprescindibles. Así o trasladou nun comunicado remitido aos medios, a alcaldesa Elvira Lama, quen avanzou a publicación dun bando ante "a crecente preocupación" polo constante aumento de casos.
Na actualidade, a localidade alcanzou un novo pico de 171 nunha poboación de menos de 10.000 habitantes, "o que supón unha das incidencias máis altas do país". Fronte a estes datos, lamentou a falta de medidas "drásticas" por parte do Goberno central e autonómico que estean "á altura da gravidade da situación".
