Bugallo vería ben pospor o Son do Camiño

O rexedor compostelán propón á Consellería de Cultura levar o festival a finais de verán
Sánchez Bugallo. XOAN REY (EFE)
photo_camera Sánchez Bugallo. XOAN REY (EFE)

O alcalde de Santiago, Xosé Sánchez Bugallo, admitiu este mércores que o Concello vería ben aprazar o festival O Son do Camiño –previsto para os días 18,19 e 20 de xuño– "para que teña maiores garantías".

Segundo apuntou en rolda de prensa o rexedor, desde o Concello trasladaron á Consellería de Cultura a posibilidade de aprazar o festival a finais de verán dada a alta afluencia que se prevé para o evento musical.

De feito, o festival galego volveu bater marcas ao esgotar en apenas unha hora e media os 30.000 abonos dispoñibles.

Por iso, o rexedor admite que un posible adiamento pode supor un "problema delicado" xa que un festival destas características leva unha organización moi complexa en relación ás empresas organizadoras, as compañías de seguros e os propios artistas.

O cartel do Son do Camiño para este 2020 conta con cantantes como Liam Gallagher, Bad Bunny, Daddy Yankee, Foals, The National ou Jason Derulo.

"A nós o que máis nos gustaría é que o festival se manteña e, se se ve que en xuño é moi forzado, non veriamos mal agosto ou setembro", sinalou o alcalde.

Con todo, Bugallo entende que non é competencia do Concello a determinación a tomar respecto diso xa que, ao seu parecer, é o Goberno autonómico o que debe "valorar" se a cita mantense.

Cuestionado tamén pola celebración das últimas festas do Apóstolo antes do próximo Ano Santo en 2021, o alcalde admitiu que non se pode prever agora se se poderán levar a cabo festas na segunda quincena de xullo polo que avogou por esperar a ver como evoluciona a pandemia xa que "está fóra da nosa capacidade decidir cando se termina isto". 

Comentarios