O Camiño de Santiago é un dos principais reclamos de Galicia e unha das causas de que a comunidade reciba cada ano a millóns de visitantes. Un camiño que agora se fai tamén por mar e que conta cada vez con máis embarcacións de recreo ou tradicionais que optan pola navegación para completar este percorrido espiritual, polo que os portos galegos son considerados xa como portos xacobeos.
Entre as rutas destacadas sobre o Camiño de Santiago atópase a do Mar de Arousa e río Ulla, “un singular itinerario marítimo e fluvial que conmemora a chegada a Galicia, por mar, do corpo do apóstolo Santiago tras o seu martirio en Xerusalén ao redor do ano 44”. De feito, a ruta marítimo-fluvial do Mar de Arousa e Río Ulla conmemora cada ano este feito seguindo os últimos tramos daquela viaxe desde a ría de Arousa ata Pontecesures (un traxecto dunhas 40 millas) para despois percorrer andando outros 25 quilómetros ata Santiago.
A importancia desta ruta é tal que conta incluso cunha fundación, a Fundación Ruta Xacobea do Mar de Arousa e Ulla, que ten entre os membros do seu padroado a representantes de 22 concellos da ría de Arousa e do camiño interior ata Santiago e pertencentes ás provincias tanto da Coruña como de Pontevedra.
