Preto dun centenar de persoas morreron desde principios deste ano en accidentes de tráfico en Galicia, segundo a asociación Stop Accidentes, que conmemorou este domingo en Vigo, do mesmo xeito que noutras cidades, o día internacional dedicado ás vítimas dese tipo de sinistros.
Representantes desa asociación fixeron ás 11.00 horas unha ofrenda floral ante o monumento erixido en honra das vítimas de accidentes, contra a indiferenza e o esquecemento, e recordaron que no conxunto de España houbo 1.830 falecidos o pasado ano, 20 máis que en 2016, ademais doutras máis de 9.000 feridas que tiveron que ser hospitalizadas.
O monumento está situado na rúa Aragón e ao acto de homenaxe acudiron decenas de persoas, moitas delas vítimas ou familiares de falecidas ou feridas en accidentes de circulación. Unha representante de Stop Accidentes en Galicia, Jeanne Picard, explicou tras a ofrenda que se trata dunha "pequena homenaxe e un chamamento a toda a sociedade”.
Posteriormente en Pontevedra, tivo lugar a lectura dun manifesto no que a asociación volveu a alertar das “terribles” consecuencias dos accidentes de tráfico, tras subliñar que cada día morren en todo o mundo máis de 3.000 persoas, delas uns cincocentos nenos, e moitas máis resultan feridas, en ocasións con secuelas para o resto da súa vida.
“Os feridos e mortos non se suman, réstanse”, destacou a responsable de Stop Accidentes en Galicia, e salientou do que anualmente falecen máis de 1,3 millóns de persoas e 50 millóns resultan lesionados en todo o mundo, principalmente nos países en desenvolvemento, por sinistros que en moitos casos "pódense evitar”.
A asociación considera que as autoridades non tomaron suficientes medidas contra os causantes deses accidentes e seguen "sen estar á beira das vítimas” ao deixar sen un castigo adecuado a persoas “irresponsables e violentas”, autores esas traxedias.
Stop Accidentes reclama un incremento das penas e sancións contra determinados comportamentos, principalmente o dalgúns condutores de abandonar o lugar do sinistro en caso de accidente de circulación, e pide aos partidos políticos un compromiso para unha “verdadeira e adecuada” reforma no Código Penal.
Ademais, pide establecer un protocolo de atención ás vítimas dos sinistros e aos seus familiares e unha formación adecuada das persoas que traballan nas oficinas de atención a esas persoas nas sedes dos xulgados. “As autoridades tamén son responsables da nosa seguridade”, insistiu Picard, quen destacou que o obxectivo desa asociación é que haxa “cero vítimas” nas vías de circulación de vehículos, tras subliñar que "todos formamos parte de tráfico, xa sexa como condutor ou peón, e polo tanto, todos somos potenciais vítimas”.
