O conselleiro de Sanidade, Julio García Comesaña, recomendou "pospoñer" a participación en marchas organizadas con motivo do Día Internacional da Muller, o 8 de marzo, ou facelas "doutra forma", dada a situación sanitaria creada pola pandemia de coronavirus.
Preguntado respecto diso este venres nun acto en Santiago, o titular de Sanidade apuntou que "en xeral" di "que non" cando se lle pregunta sobre a posibilidade de concentrarse ou acudir a un lugar con moita "xente". "Entre ir a un evento con moita xente ou non ir, ou facelo doutra forma", apuntou, o seu consello sería "pospoñelo e facelo noutro momento".
Este xoves, a plataforma Galegas 8M censurou que se pretenda culpabilizar as mulleres por reclamar os seus dereitos nas rúas e decidiu manter as mobilizacións previstas na comunidade para o 8 de marzo, que estarán adaptadas á situación sanitaria.
VARIANTES. Máis aló desa data concreta, o conselleiro advertiu de que as variantes do coronavirus detectadas —citou en concreto a británica e a surafricana— "obrigan a ser dobremente prudentes" na desescalada que comeza este venres en Galicia, ante o risco de que se produza "calquera gromo explosivo".
Nesa liña, subliñou que sería "contraproducente" que os galegos fagan a partir de agora "todo" o que ata este momento non podían polas medidas sanitarias restritivas, polo que avogou por "actuar con sentidiño" e reunirse de forma preferente en exteriores, mantendo a distancia de seguridade e con máscara salvo cando resulte "imprescindible" quitala, para tomar bebidas e alimentos.
Con esta mensaxe de "prudencia", Comesaña aludiu aos datos das unidades hospitalarias de críticos, en especial en tres áreas sanitarias da comunidade, que "preocupan" á Xunta. Tamén comparou as cifras na primeira onda da pandemia, cando o pico foi de 168 pacientes en Uci, cos desta terceira, que chegou a 264.
