O número de persoas que falan galego está a caer, segundo advirte un informe do Consello de Europa sobre a protección en España das linguas rexionais ou minoritarias feito público este martes, moi crítico coa situación do catalán. Os estudos reflicten unha caída do número de falantes, segundo o documento, que subliña como proba diso que o número de alumnos que fala galego e o practica diariamente "diminuíu considerablemente" cunha "presenza insuficiente no ensino".
O informe cualifica, en cambio, de "satisfactoria" a situación do euskera e compara o 71% de vascófonos de entre 16 e 24 anos na actualidade co 62% en 2006 e o 25% de 1991. A partir de aí, recomenda reforzar o uso do euskera no sistema de saúde (Osakidetza) e na Ertzaintza.
Do valenciano asegura que se atopa nunha "situación preocupante", sobre todo no marco da Administración do Estado e o sistema xudicial.
Sinala que a lei relativa á educación plurilingüe de 2018 "non é conforme" á Carta europea porque "imposibilita a aplicación de modelos de programas de inmersión". Recomenda que o ensino do valenciano se asegure en todos os niveis, así como o seu uso na economía e os servizos sanitarios e sociais.
Respecto ao catalán balear, o informe confirma o "profundo cambio" da política lingüística desde 2015, pola reinstauración da Dirección Xeral de Política Lingüística e a derrogación de leis e medidas que restrinxían o uso do idioma na Administración
O informe é moi crítico coa política lingüística de España respecto ao catalán e considera que a chamada lei Wert prexudica o sistema de inmersión lingüística. "As autoridades centrais continúan impoñendo o castelán nun amplo abanico de ámbitos", di o informe respecto ao catalán e pon como exemplos a sinalización de estradas, diplomas universitarios, deportes e publicidade.
Destaca o informe "os numerosos casos documentados" por ONG de discriminación cara aos catalánfalantes, en especial por parte da Policía Nacional.
Recomendacións
O texto recomenda para as linguas cooficiais de España a modificación inmediata da Lei Orgánica do Poder Xudicial para garantir o seu uso nos procesos xudiciais, se o pide unha das partes.
A segunda recomendación urxente é promover a utilización das linguas cooficiais no seo da Administración do Estado nas respectivas comunidades autónomas.
