O feminismo galego convocou para este sábado pola tarde unha vintena de concentracións noutras tantas localidades da comunidade para reclamar que "xa abonda de feminicidios" e que "o machismo mata", tras o presunto asasinato machista a madrugada deste xoves na Coruña.
A Coruña, A Guarda A Gudiña, Allariz, As Pontes, Betanzos, Cabanas, Catoira, Celanova, Compostela, Ferrol, Lalín, Moaña, Porriño, Ourense, Pontevedra, Ribadavia, Val Miñor, Vilagarcía, Vigo son os municipios galegos nos que se convocaron estas concentracións.
O crime ocorreu sobre as dúas da madrugada deste xoves no barrio coruñés do Birloque, onde o fillo da muller asasinada, Mónica Marcos, atopouna tendida no chan da vivenda sen vida.
A Policía Nacional iniciou a procura da parella da vítima, un home de 48 anos de nacionalidade española e con antecedentes por violencia de xénero a outras dúas mulleres. Finalmente, atopouno pola tarde nun hostal do centro de Madrid desde onde foi trasladado á Xefatura Superior de Policía de Madrid.
O Ministerio de Igualdade confirmou este venres que o crime é violencia machista. Así, a cifra de mulleres asasinadas por violencia de xénero en España ascende a 35 no que vai de ano e trátase da primeira en Galicia.
Mónica Marcos rexentaba unha panadería no barrio no que vivía e tiña dous fillos.