O misterio das pombas mensaxeiras que apareceron nos últimos días en Galicia ten explicación. A pasada fin de semana celebrouse unha competición en Portugal no que as aves deberían completar o percorrido desde o Algarve ata O Porto, pero por mor das tormentas moitas delas desviaron. E decenas acabaron en Galicia.
Moitas foron localizadas no sur de Pontevedra, en Vigo e O Morrazo especialmente. Pero outras chegaron ata máis lonxe. É o caso esta que xa fixo boas faragullas cunha familia de Oroso, no municipio coruñés de Sigüeiro. Alí atopouse coa pequena Nuria, que se encargou de darlle alimentos e contarlle un conto, algo que repite nos últimos días, xa que a pomba volve xornada tras xornada en busca da súa nova amiga.
Outro exemplar chegou máis lonxe aínda: a Triacastela, na provincia de Lugo pero xa cerca do límite con Castela e León. Os propietarios do bar Aira do Camiño de Fillobal atopáronse este luns cunha pomba mensaxeira que chegou a esta localidade do concello de Triacastela perdida desde Portugal.
Os donos do establecemento, Rosa María Pérez e Balbino Álvarez, viron que a pomba entraba no seu local e, tras botala en dúas ocasións, regresou. Xa comprobaron que tiña unhas anillas identificativas e puxéronse en contacto coas federacións colombófilas de Galicia e Portugal para devolvela. O animal, que é moi tranquilo, atopábase ferido e xa foi curado.
Agora buscan transporte para levala antes do domingo a Vigo, onde a recollerá o seu dono, ou Porto, cidade na que vive. A Vigo chegaron varios dos exemplares perdidos.