viernes. 29.05.2020 |
El tiempo
viernes. 29.05.2020
El tiempo

Os deputados galegos doan parte do seu soldo ou piden reducilo pola crise sanitaria

Minuto de silencio polas vítimas do coronavirus no Parlamento galego. EP
Minuto de silencio polas vítimas do coronavirus no Parlamento galego. EP
Gonzalo Caballero avanza que doará a metade dos seus ingresos e os populares aseguran que achegarán un 30%. Os parlamentarios do Grupo Común da Esquerda solicitan á Mesa que se lles reduza a nómina ao salario base. O BNG xa anunciara achegas

Os deputados que quedan na Cámara galega, os que integran a Deputación Permanente, sumáronse ás achegas económicas na loita contra o coronavirus e, neste sentido, baixáronse o soldo ou pediron reducir os seus ingresos durante o tempo que se prolongue o estado de alarma e a urxencia sanitaria. 

Así, achegarán á loita contra o coronavirus o 30 por cento do seu salario os deputados do PPdeG, o grupo maioritario da Cámara, que conta con 18 deputados na Deputación Permanente --entre titulares (nove) e suplentes (nove)--, aos que hai que sumar os conselleiros que conservan a súa acta (catro) e Alberto Núñez Feijóo, que cobran salario do Goberno.

O presidente e os dez conselleiros anunciaron, pola súa banda, que doarán tamén un 30% do seu soldo de abril para a loita contra o Covid-19. 

Mentres, o secretario xeral do PSdeG, Gonzalo Caballero, avanzou en Twitter que doará o "50 por cento dos seus ingresos desde que se decretou o estado de alarma para a loita contra a crise xerada polo Covid-19".

Gonzalo Caballero, que explica que os deputados estatais, senadores e parlamentarios autonómicos tamén contribuirán con doazóns a facer fronte á crise do Covid-19, remitiu unha carta á militancia e aos responsables públicos do partido para invitar a participar nesta campaña.

O Parlamento anunciou unha transferencia á Xunta dunha partida de 2 millóns de euros procedentes do remanente de tesourería

Pola súa banda, os deputados do Grupo Común da Esquerda, con cinco integrantes na Deputación Permanente entre titulares e suplentes, presentaron un escrito ante a Mesa para pedir que se lles reduza a nómina ao salario basee. É dicir, de 5.052 euros brutos pasar a cobrar 2.067, uns 1.400 euros mensuais --en función das retencións de cada un-- mentres dure a crise do Covid-19.

No escrito, con data de este domingo 5 de abril, os parlamentarios sosteñen que a crise do coronavirus "precisa unha implicación activa de toda a sociedade, que fai un esforzo extra para atender todas as necesidades e non deixar a ninguén atrás".

Pola súa banda, a portavoz nacional do BNG, Ana Pontón, anunciou o pasado sábado que os deputados nacionalistas doarían parte do seu salario do mes de marzo a proxectos de investigación vinculados á loita contra o Covid-19.

Mentres, En Marea --cuxos deputados conforman o Grupo Mixto-- tamén informou de que a formación política contribuirá á loita contra a pandemia, tanto con soldos dos deputados, como fondos da propia organización política.

Con todo, e a pesar da decisión adoptada na reunión da coordinadora deste luns, esta formación política "non renuncia a manifestar publicamente que tanto para estados de normalidade e como de emerxencia, é necesario que o Estado dispoña recursos suficientes obtidos de forma progresiva en función da capacidade económica de cada un, é dicir, pola vía dos impostos".

Tamén o Parlamento de Galicia anunciou unha transferencia á Xunta dunha partida de 2 millóns de euros procedentes do remanente de tesourería da institución para contribuír ás necesidades orzamentarias derivadas da pandemia.

Os deputados galegos doan parte do seu soldo ou piden reducilo pola...
comentarios