Os remolcadores mobilizados en Ares para o primeiro intento de remolque do Blue Star, quimiqueiro que encallou na zona o pasado 24 de novembro, lograron este luns que a súa popa se desprazara ao redor de 10 metros, confirmaron a Efe fontes do despregamento.
As tarefas iniciáronse ao fío das 14:00 horas, minutos antes dunha preamar, para que a ondada favorecese o seu desenvolvemento. Con todo, as condicións do mar foron menos adversas do que se tiña inicialmente previsto.
O alcalde de Ares, Julio Iglesias, declarou na zona que o plan de rescate da firma Smit Salvage, encomendada pola armadora do quimiqueiro para este labor, "marca" que as preamares axudarán entre o 10 e o 15 de decembro.
"Iniciaríanse os primeiros intentos, o barco moveuse de popa; abriu uns graos, é unha boa noticia", estimou o rexedor. En todo caso, observou que é "o primeiro día" e que as "mareas van a máis e as condicións van a mellor" para reflotar a unidade.
Preguntado por posibles novidades no rescate, evitou ofrecer "ningún prazo" e afirmou que se vai a intentar de xeito repetido".
"A primeira vez xa vimos que se moveu; se cadra é cuestión de días, de horas", declarou o alcalde aresano, que apostilou que ata o día 15 "hai prazo para actuar".
Os remolcadores Boka Pegassus e Union Princess dirixiron o traballo na franxa litoral das Mirandas, que se viu favorecido por unha xornada sen inclemencias meteorolóxicas destacables en terra.
SEGUNDO INTENTO. O operativo de rescate realizará na madrugada deste martes, sobre as 2,46 horas, un segundo intento para tratar de desencallar o barco .