A Policía Nacional detivo este mércores na Coruña a un home e ao seu fillastro ao intentar roubar no interior dun supermercado da praza de Recife.
Tras escoitar fortes golpes, unha veciña da zona alertou aos axentes, que se desprazaron ao lugar. Nese momento, viron a dous individuos saír dun edificio. Ao decatarse da presenza da Policía os presuntos culpables emprenderon a fuxida, soltando polo camiño diversos utensilios que empregaban para o furto, como unha pata de cabra, unha lanterna, unhas luvas ou unhas bolsas.
No interior do supermercado había numerosos danos, tanto na porta de urxencia como na de entrada ao local. Ademais, os individuos forzaran a caixa forte ao intentar quitala do seu sitio.
Os detidos son un home de 39 anos e un mozo de 22, ambos os naturais e veciños da cidade herculina. O padrasto conta con 24 detencións anteriores. No caso do mozo é a primeira vez que o arrestan. Os dous pasaron a disposición xudicial.
