A área sanitaria de Ferrol confirmou este luns a detección de dous brotes "distintos" de coronavirus na terceira planta do Hospital Arquitecto Marcide, onde se detectaron doce positivos.
Fontes sanitarias aseguran que un dos focos inclúe tres casos e o restante, os outros nove. A planta afectada está dedicada a especialidades como uroloxía, otorrinolaringoloxía, medicina interna ou cirurxía. A situación "segue en estudo" e levou a realizar "xa máis de 70 probas".
O Sergas apunta que non foi preciso "por agora" o traslado de pacientes que permanecían nesa zona do hospital de Ferrol. "Como medida preventiva limitáronse as visitas ao centro hospitalario temporalmente para minimizar as posibles incidencias", explica. Só se permitirá o acompañamento de pacientes menores de idade e grandes dependentes.