Un accidente no que se viron implicados dous coches e un camión, no municipio de Taboada (Lugo), deixou feridos graves aos condutores de ambos os turismos. O sinistro produciuse á primeira hora da mañá -09:30 horas- no quilómetro 34,600 da Nacional 540, segundo informou o Subsector da Garda Civil de Tráfico a AGN.
Un veciño de Ourense de 40 anos de idade, G.L.G, perdeu o control do turismo que conducía, un Citroën Xsara, cando circulaba en sentido Lugo. O coche acabou invadindo o carril contrario e chocou contra o vehículo conducido por A.A.G.F, un residente en Lugo de 67 anos de idade, que tamén resultou ferido de gravidade.
A consecuencia do impacto, o segundo turismo invadiu o carril de vehículos lentos en sentido Ourense e chocou contra un camión conducido por un veciño de Rodeiro (Pontevedra), A.V.C, de 62 anos de idade, que resultou ileso.
O accidente obrigou a regular brevemente o tráfico na vía, mentres efectivos da central de urxencias 112, da Garda Civil de Tráfico, do 061 e do Grumir de Chantada desprazáronse ao lugar do sinistro para excarcerar aos feridos e retirar os vehículos da estrada.
