O alcalde do Barco de Valdeorras, Alfredo García, quen prestou hoxe declaración como imputado nun presunto caso de prevaricación e malversación de fondos públicos derivados dos servizos da ORA, asegurou esta tarde que ten "a conciencia tranquila", segundo as súas propias palabras, coa xestión municipal.
García, quen prestou declaración durante un espazo de dúas horas, contestou as preguntas realizadas polo xuíz e pola acusación, que exerce o Partido Popular, partido que interpuxo a denuncia sobre supostas irregularidades na ORA e a limpeza de edificios municipais, que durante meses estiveron a traballar sen contrato.
O rexedor acudiu ao edificio xudicial acompañado de varios concelleiros e cargos socialistas da comarca.
En declaracións a Efe, manifestou que está "absolutamente tranquilo", no seu convencemento de que aínda que houbese erros administrativos, non houbo ningún tipo de delito. "Entre os anos 2009 e 2011 houbo un volume de traballo absolutamente inasumible", relativo a solicitudes do Plan E, subvencións públicas, motivo polo cal se deu prioridade" a outras cuestións, explicou.
A imputación do alcalde socialista produciuse por mor dunha denuncia interposta o pasado mes de abril polo PP contra o alcalde por presuntas ilegalidades detectadas na concesión da zona ORA e no servizo de limpeza municipal.
No primeiro caso, os populares denunciaron que a empresa Dornier levaba cinco anos prestando o servizo sen contrato (o contrato era por dous anos), período durante o cal se ampliaron rúas con zona azul", a pesar de que a empresa non ingresaba o canon correspondente porque a prestación dicía que era deficitario.
No caso da limpeza, os traballadores estiveron a prestar servizos "nos trinta meses seguintes" a caducar o contrato, motivo polo que se levantaron ata "69 reparos" a este servizo, detallou o portavoz popular Moisés Blanco.
A este respecto, o rexedor barquense, quen se mostrou "absolutamente tranquilo" por este proceso, acusou os populares de querer "xudicializar a vida política deste Concello".
Así mesmo, pediu "que se deixe traballar á xustiza" e engadiu que "contestarei a todas as preguntas" unha vez que se pronuncie o xuíz, "pero non antes" porque antes estaría a contaminar o proceso xudicial, advertiu.
O rexedor mostrou o seu convencemento de que "quedou claro polas declaracións dos técnicos e a miña que esta situación se debeu a un cúmulo de circunstancias" o que fixo que se atrasasen expedientes".
No entanto, advertiu de que esta situación "non quere dicir que o Concello estivese á deriva" senón que se priorizaron outras cuestións.
O rexedor socialista prestou declaración despois de que o fixeron os técnicos. Polo momento, declararon por estes feitos cinco técnicos, entre eles dous interventores e un secretario municipal.
O alcalde do Barco permanece ''tranquilo'' tras declarar por un presunto caso de prevaricación
