O xerente de Espectáculos Lito, Ángel Martínez Pérez, acolleuse ao seu dereito a non declarar nos xulgados de Caldas de Reis (Pontevedra), onde estaba citado en relación á querela que a Fiscalía mantén contra el e a súa empresa, por unha suposta fraude de case 9 millóns de euros e seis delitos relacionados cos impostos de sociedades, IVE e IRPF.
Segundo expuxo o fiscal de asuntos económicos, Augusto Santaló, "o problema" aquí é "que se xuntan moitos delitos", de forma que "teoricamente xa só se se vai polos seis delitos, ao final saen seis anos", o que conduciría ao cárcere ao devandito. Martínez Pérez compareceu este luns nos xulgados, a diferenza do que fixese hai un mes, cando alegou problemas de saúde. "Di que non está en condicións", apuntou o fiscal, en declaracións aos xornalistas á saída da sede xudicial. "Non se lle ve moi ben –alega depresión–, pero hai un informe forense do 1 de abril que di que está en condicións", engadiu.
Así, o xerente asistiu acompañado dun avogado e da súa muller, e abandonou as instalacións case dúas horas despois de entrar, sen facer ningunha valoración ante os medios de comunicación. "Non quero facer ningunha declaración", limitouse a sinalar. Santaló, pola súa banda, explicou que, pola súa banda, deron por "cumprido" o trámite procesual. "Dixemos que a efectos procesuais declarara", indicou.
"AS ORQUESTRAS NON EXISTEN COMO EMPRESARIOS". A continuación, segundo relatou, compareceu o representante da empresa, que foi un traballador "e describiu un pouco o funcionamento, a teoría que se mantén de que eles son meros intermediarios, e que en realidade son as orquestras as obrigadas a tributar". "O que vén dicindo, cando as orquestras non existen como empresarios, entón non poden facturar", destacou.
Coa reforma do Código Penal, as persoas xurídicas tamén responden penalmente. Por iso é polo que, neste caso, se opta por que o que comparecese, en lugar do propio administrador, fose un representante distinto, algo que o fiscal dixo que se fai "ás veces para evitar incompatibilidades". O fiscal comentou que, entre outras cuestións, este traballador trasladou que "a Seguridade Social téñena que pagar as comisións de festas, cousa que non fan". "A teoría de que eles son meros intermediarios", resumiu.
"PROCEDEMENTO ABREVIADO E ACUSACIÓN". Sobre a nova fase que se abrirá agora, considerou que, "se as partes non piden dilixencias, isto normalmente debe continuar polo trámite do procedemento abreviado e acusación". Fiscalía, pola súa banda, mantén a "mesma posición" –aínda non redactou escrito de acusación–, por delitos que incumben ao labor de Espectáculos Lito. "Non estamos a investigar a Panorama nin a París de Noia nin a ningunha orquestra. Estamos a investigar a Lito e ás súas empresas", precisou.
Sobre a pena que podería chegar a carrexar este caso, reflectiu que "as penas van dun a cinco anos por delitos fiscais, con multas do tanto ao séxtuplo, e perda de privación de subvencións e Seguridade Social". "O problema que teñen é que se xuntan moitos delitos, só nesta querela seis. A pena mínima é un, pois... Teoricamente xa só aquí se se vai polos seis delitos, ao final saen seis anos", reflexionou, antes de responder afirmativamente á pregunta de se habería que determinar prisión.
O xerente de Espectáculos Lito négase a declarar
O representante das orquestras Panorama e París de Noia compareceu nos xulgados de Caldas en relación co suposto fraude de 9 millóns de euros por evadir impostos
