O PPdeG fará unha ofrenda floral a Fraga como "referente do galeguismo"

O PPdeG fará o vindeiro venres unha ofrenda floral a Manuel Fraga, presidente fundador do PP, "como referente do partido e tamén do galeguismo". A esa ofrenda, con todo, non acudirá o líder dos populares galegos e presidente da Xunta, Alberto Núñez Feijóo, por "imposibilidade" de axenda.

O secretario xeral do PP galego, Miguel Tellado, recordou en conferencia de prensa que o partido en Galicia, como organización, porque xa o facía nas institucións, celebra desde o pasado ano o Día de Galicia. Segundo Tellado, o obxectivo do partido é "honrar a figuras crave na construción da terra como hoxe a coñecemos", a Galicia actual, e por iso este ano elixiron facer unha ofrenda floral ante o busto de Manuel Fraga en Vilalba.

"Fraga é un referente para os que formamos parte do PP e tamén do galeguismo. Fixo do PPdeG algo distinto do PP nacional", destacou Tellado, que indicou que os "valores" que deixou, "como a defensa dos intereses de Galicia" forman parte do ADN do PPdeG. "Nos tempos que vivimos de fantasías de independentistas, de nacionalistas que queren copiar a populistas (...) o PPdeG reivindica un galeguismo aberto, cordial, centrado e responsable", dixo.

Está previsto que á ofrenda acudan o propio Tellado como secretario xeral do partido en Galicia, a presidenta provincial de Lugo, Elena Candia, o secretario xeral de Novas Xeracións, Diego Gago, e o portavoz parlamentario do partido en Galicia, Pedro Puy Fraga. Segundo Tellado, o seu partido busca un galeguismo "aberto e plural" que non se encerre en "si mesmo" e que opte pola "cooperación en lugar da confrontación".

Na súa intervención, o secretario xeral do PPdeG mostrouse convencido de que hai "moitísimos máis galegos identificados coa figura do presidente Fraga e co seu legado" que coas persoas "que determinados partidos traerán esta fin de semana" a Galicia. "(Xosé Manuel) Beiras e os seus compañeiros de Anova traerán aos seus amigos da CUP e de Bildu para intentar copiar algo tan pouco relacionado cos intereses de Galicia como o secesionismo vasco e catalán. Esta semana vimos como Beiras se nega a xubilarse e como pasou de apoiar a Luís Villares a conspirar contra el de forma clara e contundente", abundou.

Tellado aventurou que "moita xente" que nalgún momento apoiou ás "Mareas de Podemos" pode non estar "moi conforme" cunha formación que, na súa opinión, divídese entre os que teñen como "único interese aventuras separatistas" e os que buscan "subirse o soldo, converterse en tresmileuristas, tras buscar ter chofer e secretaria, en lugar de traballar polos galegos", concluíu.