O PSdeG expulsa o edil que apoiou a moción de censura da Mezquita

A secretaria de organización do PSdeG, Pilar Cancela, sinalou que o seu partido abriu un expediente de expulsión inmediata a José Antonio Pérez Carballo, edil da Mezquita, Ourense, que apoiou a moción de censura que os independentes presentaron contra o alcalde, Rafael Pérez (BNG).

Nunha conferencia de prensa celebrada esta tarde, Cancela indicou que esta determinación a tomaron "conxuntamente" a executiva galega e a provincial de Ourense ao entender que é "unha falta moi grave merecedora desa sanción de expulsión inmediata".

Confesou que este asunto a pillou por sorpresa, a ela, pero non ao secretario provincial, Raúl Fernández. Estas cuestións "suceden" e hai que "tomalas con normalidade" aínda que se trate dunha decisión, "a última que sempre lle gustaría tomar" a alguén, pero "cando é moi grave -o comportamento- non queda máis remedio que facelo".

Tamén o PSOE declarou esta tarde a súa suspensión de militancia. Aseguran que esta decisión xa foi comunicada ao interesado mediante burofax.

Os independentes da Mezquita presentaron este mércores unha moción de censura neste concello ourensán, co apoio do edil socialista José Antonio Pérez Carballo, e foi presentada polo exdiputado provincial popular Francisco Montesinos Rodríguez. Desta prosperar, rompería o goberno local -formado por BNG, PSdeG e PP e estruturado con catro
independentes, dous do BNG, dous do PSdeG e un do PP- que dirixe o nacionalista Rafael Pérez desde as últimas eleccións municipais de 2011.

En declaracións a Efe, o alcalde nacionalista tachou o ocorrido dun "pouco surrealista" e recordou que o goberno actual contou co apoio dos dous concelleiros socialistas e o respaldo do PP. O rexedor nacionalista negou problemas con Montesinos e apuntou que o concelleiro socialista, que agora se aliou cos independentes "rompeu un par de veces a disciplina de voto" nos plenos municipais.

Rafael Pérez interpretou este movemento como un intento do propio Montesinos para facerse coa alcaldía, na que xa estivo durante doce anos. Actualmente leva sete na oposición.

A moción, en principio, está prevista para o seu debate en pleno nos primeiros días de febreiro. O alcalde ten un prazo de dez días hábiles para convocar a sesión.

Comentarios