O tribunal das oposicións á Policía Local de Vigo acorda repetir a proba

O tribunal das oposicións á Policía Local de Vigo resolveu repetir a proba teórica e recusar a dous vogais ao considerar probada unha relación de "amizade íntima" con varios aspirantes no proceso selectivo, incompatible coas causas de abstención/recusación legalmente establecidas.

O secretario do tribunal determina no seu escrito, ao que tivo acceso Efe, que se retrotraigan as actuacións ao momento inmediato anterior á elaboración e celebración do exercicio teórico, noméese aos substitutos dos vogais revogados e procédase sen demora" a celebrar a proba anulada.

Unha das probas achegadas polos aspirantes que impugnaron o proceso selectivo para demostrar a relación entre os vogais recusados e dous opositores son unhas fotos colgadas en Facebook dunha cea de Nadal na que aparecen xuntos e de celebración, así como a súa relación de amizade na citada rede social.

Durante o período de alegacións, os vogais recusados, axentes da Policía Local de Mos, limitaron a unha relación profesional a que manteñen cos opositores en cuestión, que traballaron como auxiliares municipais, e esgrimiron que a esa cea acudiron moitos máis compañeiros que tamén aparecen nas fotos.

Considera o tribunal que, aceptada a recusación destes dous vogais pola concorrencia dunha "sospeita fundada" de relación de amizade íntima, todas as actuacións relativas ao primeiro exercicio "resultan inevitablemente contaminadas", polo que se impón a súa nulidade.