Dous falecementos elevan a 2.625 as vítimas do covid-19 en Galicia

O 91,2% dos galegos maiores de 12 anos recibiron a pauta completa da vacina
Hospital Povisa de Vigo. DP
photo_camera Hospital Povisa de Vigo. DP

As autoridades sanitarias galegas notificaron este mércores outros dous falecementos de dous homes diagnosticados con covid-19, o que sitúa en 2.625 as vítimas mortais vinculadas coa pandemia na comunidade. 

Segundo informa Sanidade, faleceron dous homes de 90 e 77 anos no Complexo Hospitalario Universitario de Santiago (CHUS) e en Povisa, respectivamente. Ambos presentaban patoloxías previas. 

Os casos de covid seguen remitindo na área sanitaria de Pontevedra e O Salnés

VACINAS. O 91,2% dos galegos maiores de 12 anos recibiron a pauta completa da vacina contra a covid-19, o que sitúa a Galicia como a comunidade con maior poboación diana inmunizada, segundo o conselleiro de Sanidade, Julio García Comesaña.

En declaracións aos xornalistas en Pontevedra, García Comesaña engadiu que o 93,5 desta poboación diana foi inxectada con polo menos unha dose da vacina.

Desde o inicio da campaña de vacinación, o pasado 27 de decembro, Galicia puxo 4.336.937 dose dos preparados contra a covid-19.

Un total de 2.249.1188 persoas teñen a pauta completa, mentres que outros 48.632 galegos teñen posta unha única dose.

A estas cifras súmanse as 2.427 persoas que recibiron a terceira dose, reservada ata o momento para pacientes inmunodeprimidos e maiores ingresados en residencias.

Con respecto á vacinación en etapas escolares, o titular de Sanidade sinalou que o 91,2% do alumnado entre 12 e 19 anos ten administrada unha dose, mentres que o 83,2% xa a recibiu completa, sendo "unha das taxas máis altas de España".

Galicia está "pendente" dos resultados dos ensaios de Pfizer con menores de 12 anos e "en canto se pronuncie a Axencia Europea do Medicamento", segundo Julio García Comesaña, "teremos todo preparado para comezar".

Ante o avanzado proceso de vacinación, Galicia pechará os puntos de vacinación masiva, que serán substituídos por pequenos "puntos" que previsiblemente estarán situados nos centros sanitarios de toda a comunidade.