O presidente da Xunta, Alberto Núñez Feijóo, asegurou que consultará ao comité clínico sobre a idoneidade do uso de máscaras nos recreos ante a "falta de claridade" do Goberno central en relación ao decreto aprobado esta semana.
A normativa que pon fin ao uso das máscaras de protección contra a propagación do coronavirus en zonas exteriores, segundo Feijóo "contradi" o protocolo educativo "de obrigado cumprimento para o conxunto do sistema educativo español".
Segundo indicou Feijóo este mércores en Santiago de Compostela, hai "dúbidas" sobre a legalidade da decisión do Goberno de que os alumnos poidan retirar a máscara en patios de colexios, xa que entra en contradición co protocolo contra a pandemia de covid-19 no ámbito educativo, que o mesmo Goberno elaborou.
O titular da Xunta preguntouse se o novo decreto do Goberno "vén derrogar de forma explícita o protocolo que esixe máscara nos colexios cando non se pode manter a distancia dun metro e medio" e se, no caso de ser así, hai un novo protocolo para a situación actual.
Feijóo reprochou "certa opacidade e bastante improvisación" por parte do Executivo, xa que todas as persoas responsables da saúde pública, segundo dixo, pregúntanse que deben facer.
"Necesitaremos ter unha proposta clara", declarou o presidente da Xunta, que criticou ao Goberno por seguir "delegando as decisións nas comunidades autónomas" e non tomar decisións "no ámbito das súas competencias".
Ante esta falta de claridade, Feijóo sinalou que pedirá "información e proposta" ao comité clínico, no caso de que o Goberno "non clarifique" as dúbidas respecto diso.
"Se o Goberno nos aclara nas próximas horas como debemos de entender a lei, aplicaremos a recomendación do Goberno, e se non o aclara pois será o comité clínico do servizo galego de saúde o que faga a proposta e nós trasladarémola á comunidade educativa e aos pais", explicou.
En todo caso, Feijóo valorou a decisión do Goberno de diminuír "a presenza das máscaras na rúa", xa que logo das festividades do Nadal, unha vez que baixou a interacción social e as aglomeracións, é "lóxico" volver outra vez a utilizar as máscaras só en supostos excepcionais, onde non se pode gardar a distancia de seguridade.
Con todo, mostrou dúbidas sobre o uso de máscaras nos patios, alegando que "se nos acontecementos multitudinarios, cando non se poida manter a distancia de 1,5 metros é necesaria a máscara", que ocorre en momento de aglomeración en centros escolares.
"Á entrada dun colexio, onde entran cen rapaces á vez, ou nun recreo, cun espazo limitado onde xogan cen ou máis rapaces á vez e non se poida manter a distancia de seguridade, a eses nenos, que non están vacinados, ¿sacámoslles a máscara por imperativo legal?", preguntou.
"Imos ver que é o que nos expón o comité clínico. A nós o que nos interesa é a saúde dos nenos, que os colexios sexan lugares seguros e que os pais e nais sentan tranquilos coas recomendacións que expón o servizo de saúde", advertiu.
Respecto ao documento acreditativo de vacinación ou de superar a enfermidade esixido para acceder a lugares e transportes públicos, o presidente da Xunta asegurou que a Galicia lle vai ben" o certificado, polo que pedirá unha prórroga ás autoridades xudiciais.
Feijóo reclama estender a obrigatoriedade de presentalo en espazos en que ata agora era exixible, é dicir, hostalería, ximnasios, residencias de maiores, eventos multitudinarios, locais que sirvan comida e bebida e outros.
"Pedimos unha prórroga deste certificado para os próximos días porque aínda non rematamos a terceira dose en todos os maiores e a segunda dose entre 5 e 11 anos. A medida que vaiamos rematando esa vacinación probablemente o comité clínico aconsellará que non sexa imperioso a necesidade de presentar un certificado covid", sinalou.
O certificado "esíxese na inmensa maioría dos países europeos, é unha ferramenta non custosa para os cidadáns, é ben fácil de mostrar e incita á seguridade nos locais e á vacinación das persoas que aínda non se vacinaron", engadiu.
Sobre a variante ómicron do coronavirus, máis contaxiosa, considerou que non se debe considerar que sexa "menos daniña" alegando que aínda que hai "máis do 94 % da poboación vacinada con dúas dose", a pandemia aínda non desapareceu.
As pandemias "non se derrogan por decreto" e continúan "mentres o virus non estea controlado e a porcentaxe de poboación inmunizada non sexa o óptimo", concluíu.
