As novas restricións anunciadas este mércores pola Xunta para tratar de frear a expansión do coronavirus na que é xa a terceira onda van acompañadas de chamadas á prevención e á responsabilidade, coas que apela a reducir os movementos e os contactos ao "esencial". É por iso que as reunións de non conviventes quedan limitadas a catro persoas e que Alberto Núñez Feijóo subliñou que non debe habelas nas casas a partir das seis da tarde, a hora de peche establecida para a hostalería.
"Se vamos trasladar o bar ao noso domicilio, se vamos ter reunións de non conviventes nos nosos domicilios, evidentemente ímonos autoenganar", subliñou o presidente galego na comparecencia na que anunciou as novas medidas. Incidiu, nesa liña, en que "a unidade familiar é o único lugar seguro".
Máis información: As novas restricións: toque de queda ás 22.00 e reunións de 4 persoas
Toda Galicia estará desde o venres, e "probablemente ata mediados de febreiro", nos dous niveis máis altos de protección do protocolo fronte á pandemia. Xunto ás restricións —polas que o toque de queda se adianta ás dez da noite e o horario de peche do comercio queda fixado nas 21.30, ademais das limitacións establecidas para hostalería, mobilidade e reunións—, a Xunta chama aos cidadáns a facer só "o esencial". E iso é "acudir ao médico, ao colexio, ao traballo —incidindo no teletraballo, sempre que sexa posible-, ao coidado de menores e maiores e á compra dos aveños indispensables".
¿CONFINAMENTO? Con todo, o presidente da Xunta volveu descartar un confinamento xeral da poboación galega para frear a expansión do coronavirus, e considerou que as novas restricións e recomendacións —"moi estritas"— producirán un "efecto moi parecido" se se cumpren.
Feijóo apuntou que a situación é "mala sen paliativos", pero "mellor que a media de España", e defendeu que non é necesario botar man dun confinamento xeral como o de Portugal. Si reclamou un "maior rigor e control nas interaccións" co país veciño, que ten unha "incidencia moi alta" e produce un efecto similar nos municipios galegos limítrofes.
