Feijóo pedirá ao Goberno central a baixada do Ive dos produtos para celiacos

O presidente da Xunta, Alberto Núñez Feijóo, lanzou este martes a súa aposta para que Galicia sexa un "referente" na conciliación familiar e nos horarios laborais nos próximos anos.

A unhas horas do discurso do presidente do Goberno en funcións, Mariano Rajoy, no debate de investidura, Feijóo alegrouse do pacto acordado entre o PP e Ciudadanos porque, entre outras cousas, nos 150 puntos asinados existe un "importante" de conciliación familiar.

O candidato do PPdeG a revalidar o seu posto á fronte da Xunta profundou, nun acto sectorial con entidades sociais en Ferrol, na necesidade de "ver como se poden mellorar" os horarios laborais en España, co fin de que os pais poidan, a partir das 18 horas, "ver crecer, axudar e educar" aos seus fillos.

No marco do Parque Reina Sofía da urbe naval, Feijóo anunciou así mesmo a petición ao Goberno central da revisión do Ive dos alimentos sen gluten, de modo que os celíacos vexan rebaixado o prezo dos produtos que consomen habitualmente.

"Os celíacos son persoas igual de importantes, por iso comprometémonos a intentar pór de acordo ás comunidades autónomas para a rebaixa do Ive", asegurou Feijóo, que repasou as actuacións do seu goberno desde a súa chegada a San Caetano en 2009.

No acto, centrado na "importancia das familias", o presidente autonómico estivo flanqueado polo número un do PPdeG pola Coruña, Diego Calvo, e polo número catro da mesma lista e conselleiro de Política Social, José Manuel Rey Varela.

Feijóo ofreceu varios datos do que a súa executiva fixo en Galicia "en anos de vacas fracas", anos nos que, apuntou, "había que demostrar que un dos obxectivos da democracia era non deixar a xente na cuneta".

Entre as actuacións que destacou, o presidente popular enumerou a creación da axenda social única, entre Xunta e concellos, a eliminación do imposto de sucesións desde este ano ou a elaboración de "mecanismo para que a xente non sexa lanzada da súa casa".

A continuación, detallou algúns dos obxectivos dos próximos meses, como as "listas de espera a cero" nos colexios no curso que comeza, e subliñou que a gratuidade do bus interurbano permanecerá "todo o tempo" que estean no goberno.

Por todo iso, Feijóo considerou "unha honra servir a Galicia durante todos estes anos", tras os que a comunidade é "máis solidaria", aínda que abundou en que "o obxectivo non é vangloriarse, senón seguir traballando". "Convócovos a unha Galicia mellor, igual que o é a de agora mellor que a de 2009 e 2012", concluíu o presidente, que a continuación, xunto a Rey Varela, atendeu ás preguntas dos presentes.

O conselleiro de Política Social mencionou que "agora que as contas públicas van mellor, é necesario que as familias perciban esa mellora económica" e agregou, entre os obxectivos, o desenvolvemento dunha lei de inclusión.

Pola súa banda, Calvo incidiu no "caos" no que se convertería Galicia se, do mesmo xeito que en Madrid, non se formase goberno de xeito rápido, pois as entidades "non poden permitirse o luxo de non recibir unha contestación urxente".