A Comunidade galega sumou este ano un 11,8 por cento de persoas ao Rexistro Profesional de Socorristas Acuáticos, que alcanza os 5.404 inscritos.
Ante o inicio da tempada estival, a Xunta informa nun comunicado de que o número de socorristas aumentou respecto ao último curso nuns seiscentos.
O obxectivo do Goberno autonómico, engade, é que as praias galegas conten con profesionais do rescate durante o verán, aínda que recorda que a súa contratación é competencia municipal.
Fai dous veráns, algúns concellos queixáronse da imposibilidade de contratar socorristas debido á ausencia de profesionais dispoñibles, o que levou á perda de bandeiras azuis como o caso de Miño (A Coruña).
