As máscaras provistas de válvula exhalatoria quedan excluídas do protocolo marcado pola Consellería de Sanidade para o uso deste elemento de protección en espazos públicos que publica o Diario Oficial de Galicia (DOG).
Nunha resolución que modifica un acordo do Consello da Xunta do pasado 12 de xuño, Sanidade establece que o tipo de máscara que ten de usarse en espazos públicos tanto abertos como pechados "non deberá estar provista de válvula exhalatoria, excepto nos usos profesionais para os que este tipo de máscara poida estar recomendada".
As novas indicacións tamén extreman o uso da máscara, que será obrigatoria en case "todas" as circunstancias. Establécese que debe usarse este nbsp;elemento&de protección en lugares, tanto ao aire libre como en espazos pechados, onde non poida garantirse o mantemento da distancia de seguridade de 1,5 metros.
A normativa da Xunta exceptúa os supostos nos que se poida permanecer sentado dentro dun espazo pechado a condición de que existan medidas que permitan que se manteña "en todo momento" a distancia de seguridade necesaria.
Verbenas: máximo de 2.000 persoas e espazos acoutados
As verbenas de verán en Galicia deberán celebrarse en espazos acoutados que permitan controlar os aforamentos e estes serán, nos recintos máis grandes, dun máximo de 2.000 persoas, que deberán usar máscara e respectar a distancia de seguridade de tres metros cadrados por individuo.
Estas son algunhas das normas incluídas pola Xunta para a celebración destes eventos, que arrincarán en Galicia o mércores, día 1, e para os que, advertiu o vicepresidente da Xunta, Alfonso Rueda, incrementarase a vixilancia, co obxectivo de que se cumpran as medidas.
O protocolo, elaborado por expertos en colaboración co sector, será "gradual", en función da evolución da pandemia. Con iso, articulará dúas fases: unha desde o mércores ata fin de mes e outra a partir do día 31 de xullo, na que se analizará a posibilidade de ampliar aforamentos.
De forma xenérica, tanto en locais de lecer nocturno como en festas e verbenas e en atraccións de feira, esixiranse as medidas de protección básicas, como a desinfección, o mantemento da distancia de seguridade e o uso de máscara.
No caso das verbenas, o aforamento dependerá da superficie onde se celebre, que deberá acoutarse. En todo caso, para espazos inferiores a 8.000 metros cadrados, haberá un máximo de 1.000 asistentes e nos máis grandes, ata 2.000 persoas. Os aforamentos deberán cumprirse delimitando a área e establecendo un punto de entrada e outro de saída.
O escenario deberá estar, polo menos, a catro metros de distancia do público e tanto os compoñentes das orquestras como o público terán que usar máscara. Só serán unha excepción a esta norma os vocalistas e intérpretes de instrumentos de vento.
En canto ás atraccións de feira, tamén deberán respectar a distancia de seguridade, con espazo de tres metros cadrados por persoa para calcular os aforamentos, que serán de 700 persoas como máximo en caso de superficies inferiores a 8.000 metros cadrados e de 1.000 nas máis grandes. No caso de que non se poida garantir a separación, o aforamento quedará reducido ao 50% e tamén será obrigatoria a máscara.
Lecer nocturno: un número de contacto e 2/3 do aforamento
En canto aos locais de lecer nocturno os usuarios deberán usar máscara e pediráselles que deixen un número de teléfono para localizalos no caso de que se detecte un positivo. Este sistema de rexistro, será obrigatorio para os locais, aínda que a cesión de datos será voluntaria.
O aforamento deste tipo de establecementos limitarase a dous terzos da súa capacidade, inferior ao 75% actual do resto de bares e restaurantes, aínda que as terrazas estarán ao 80%. As pistas de baile, coa intención de garantir a distancia de seguridade, terán unha ocupación máxima do 50%.
Rueda garantiu que a Xunta será "moi esixente" co cumprimento deste protocolo e que estará "vixiante" para comprobar que se respectan todas as medidas. Apelou " responsabilidade individual" e avanzou que a Xunta porá en marcha un plan especial de vixilancia por parte da Policía autonómica para facer as comprobacións oportunas.
Praias e parques amplían o seu aforamento: ata tres metros cadrados por cada persoa
A Consellería de Sanidade amplía ata tres metros cadrados por persoa os aforamentos permitidos a partir do mércores, día 1, tanto en praias como en parques infantís, parques biosaludables, zonas deportivas, pistas de skate e outros espazos públicos ao aire libre similares.
Segundo consta nas novas instrucións para previr contagios, estas zonas estenden así o máximo de cidadáns permitidos, posto que polo momento o límite estaba fixado nunhas persoas por cada catro metros cadrado.
Ademais, as normas nas praias precisan agora que os concellos deberán establecer as medidas necesarias para garantir que os cidadáns manteñen as distancias de seguridade interpersoal "tamén nas zonas de acceso e saída" co obxectivo de evitar "aglomeracións".
A iso súmase, que as entidades locais poderán establecer límites tanto nos tempos de permanencia nos areais como no acceso aos aparcadoiros para "facilitar o control da capacidade".
OUTRAS ACTIVIDADES. A resolución tamén amplía o aforamento permitido, ata o 75% do máximo, para locais de azar e casinos, albergues turísticos e actividades destinadas á poboación infantil e xuvenil en espazos pechados –aínda que non poderán participar máis de 150 persoas, incluídos monitores–. No caso de que estes últimos teñan lugar en espazos abertos, mantense o límite ao 75% e cun máximo de 250 persoas.
Así mesmo, a Consellería engade unha instrución para a celebración de competicións federadas e eventos deportivos en vía pública que conten con asistentes, entre as que menciona "atletismo, ciclismo, rallies automobilísticos, remo e similares".
Deberán ser aprobadas polas autoridades locais correspondentes ou pola autoridade autonómica, no caso de que se desenvolvan por máis dun termo municipal.
Para a súa celebración delimitarase o espazo e o itinerario e a asistencia de público estará limitada a 1.000 persoas.
Segundo dispón a resolución que recolle o Diario Oficial de Galicia (DOG), poderanse superar os límites de capacidade fixados, previa autorización da Administración e "atendendo á evolución da situación epidemiolóxica, ás concretas medidas organizativas e de seguridade propostas e aos riscos de contagios".
As solicitudes destas actividades deberán ir acompañadas dun plan de prevención cos criterios sinalados polo Centro de Coordinación de Alertas e Urxencias Sanitarias, que depende do Ministerio de Sanidade.
