lunes. 29.11.2021 |
El tiempo
lunes. 29.11.2021
El tiempo

Galicia pechou o mes de marzo con máis de 10.500 perceptores da Risga

A Xunta asegura que "non hai lista de espera" para acceder á prestación e que as peticións se están resolvendo en "un mes ou mes e medio"

Galicia tiña, ao peche do mes de marzo, un total de 10.560 perceptores da Renda de Inclusión Social de Galicia (Risga), unha cifra que supón unha importante caída con respecto ao final do ano pasado, cando case se alcanzaban os 14.000 beneficiarios. Ademais, segundo os datos do último mes completo, outras 4.008 persoas están inscritas nalgún dos programas de inclusión activa no mercado laboral.

Son cifras achegadas polo director xeral de Inclusión Social, Arturo Parrado, en comisión parlamentaria, onde tamén puxo de manifesto que "non hai lista de espera" para acceder á Risga e que as peticións se están resolvendo en, aproximadamente, "un mes ou mes e medio". Respecto diso, a preguntas da deputada do PSdeG Carmen Gallego, sinalou que a lei marca un tempo máximo de dous meses e que, a pesar de que ese marco está superado, o seu obxectivo é "axilizar moito máis" o proceso. "Non estou satisfeito", salientou.

Ao fío diso, sobre a orde de contratación de perceptores da Risga, destacou que foron 1.600 persoas as que, en 2014 e 2015, lograron un emprego en base a esta iniciativa. "Oxalá este ano sexan máis", recalcou este alto cargo do departamento que dirixe José Manuel Rey.

En paralelo, apuntou que a Consellería de Economía destina 25 millóns de euros a loitar pola inserción laboral das persoas "máis desfavorecidas", como discapacitados ou persoas en risco de exclusión social.

DATOS DE POBREZA. Outro dato que achegou ao órgano parlamentario, a instancias da socialista, é o relativo á pobreza en Galicia. Tomando como basee datos do Instituto Galego de Estatística (Ige), resaltou a súa caída en 2013 e 2014, os últimos anos analizados: do 23,58% de 2012 pasouse ao 22,11% de 2014, apuntou.

Respecto diso, Carmen Gallego recordou que o índice de pobreza calcúlase en función dos ingresos globais, que durante a crise caeron de forma xeneralizada; e volveu a preguntar polo "atraso de dous anos" no desenvolvemento da Lei de inclusión social. "Pronto terá noticias", comprometeu o director xeral.

Galicia pechou o mes de marzo con máis de 10.500 perceptores da Risga
comentarios
ç