A Asociación Provincial de Empresarios de Hostalería da Coruña presentou este martes un recurso ante o Tribunal Superior de Xustiza de Galicia para pedir a anulación das últimas restricións decretadas pola Xunta para o sector, como a redución do aforamento ao 30% no interior dos locais de municipios en nivel alto
Segundo informa a Efe o presidente do colectivo, Héctor Cañete, reclaman no seu escrito a suspensión de todas as medidas.
Se a súa demanda non se estima totalmente, os hostaleiros piden que polo menos se levanten os límites de aforamento en terraza, as restricións de horario e a prohibición de usar a barra.
Ademais, Cañete asegura que o 89,2% das empresas socias da asociación (ao redor de 1.200) preferían o certificado covid ao consideralo “menos lesivo”.
Neste sentido, indica que a obrigación de pedir un certificado de vacinación ou unha proba negativa, requirimento tombado polo TSXG, supuña unha restrición menor que as actuais.