Investigadores da USC abren a posibilidade de detectar o cancro antes da súa aparición

Realizaron o maior estudo ata a data no campo da xenómica dos tumores malignos
photo_camera Un médico. PIXABAY

Investigadores da Universidade de Santiago de Compostela descubriron un mecanismo de mutación crave no desenvolvemento do cancro en humanos que explica a evolución de certos tumores e abre novas vías de prevención e tratamento desta enfermidade. 

Trátase do maior traballo realizado ata a data no campo da xenómica do cancro e incluíu a análise de tumores en case 3.000 pacientes e 38 tipos de cancro, segundo destaca o gabinete de comunicación da USC. 

"Mentres todos os meus compañeiros centraban a súa atención nos xenes do noso xenoma, eu dedicábame a buscar no ADN lixo", sinalou o doutor Jose M.C. Tubío, director do grupo 'Xenomas e Enfermidade' do CiMUS da USC, equipo que se encargou de liderar unha investigación enmarcada no consorcio internacional Pan-Cancer

Ao longo de sete anos, 1.000 investigadores de todo o mundo centraron os seus traballos en analizar xenoma dos tumores en 3.000 pacientes. O froito destes anos de traballo revelou a importancia no desenvolvemento de certos tipos de cancro dos retrotransposones, unha parte do material xenético humano que ata hai pouco era considerado como "ADN lixo"

"No noso laboratorio xa estamos a levar a cabo pequenas probas de concepto, probando diferentes tratamentos para frear este proceso mutacional"

"Identificamos un novo mecanismo de mutación que consiste en que cando os retrotransposones mobilízanse no xenoma tumoral, algo que ocorre con máis frecuencia que nas células non tumorais, poden producir perdas enormes de material xenético no punto no que se integran", apuntou o investigador da USC, Bernardo Rodríguez-Martín, primeiro asinante do traballo que este mércores foi publicado nas revistas científicas 'Nature' e 'Nature Genetics'. 

Deste xeito, a investigación sinala que as perdas que orixinan a integración de retrotransposones poden carrexar a desaparición de xenes importantes á hora de manter o funcionamento normal dunha célula. Cando isto sucede, sinala Rodríguez-Martín, facilita a aparición de cancro, especialmente nos tipos de esófago, cabeza e pescozo, pulmón e colonorectal. 

Así as cousas, os científicos consideran que este achado pode ter un impacto a curto prazo nos diagnósticos oncolóxicos e os prognósticos sobre a evolución dos tumores. En canto ao medio prazo, estiman que poderán desenvolverse tratamentos para "frear" este mecanismo de mutación, algo no que xa traballa o equipo de investigación. 

"No noso laboratorio xa estamos a levar a cabo pequenas probas de concepto, probando diferentes tratamentos para frear este proceso mutacional tan relevante nalgúns tipos de cancro", incidiu Rodríguez-Martín. 

Comentarios