O delegado do Goberno en Galicia, Samuel Juárez, asegurou hoxe que Resistencia Galega é unha organización terrorista que está "sumamente debilitada" actualmente debido sobre todo á acción policial e ás detencións practicadas nos últimos tres anos.
A Garda Civil detivo o pasado venres en Santiago de Compostela ao membro do grupo terrorista Resistencia Galega Raúl Agulleiro Cartoy, presunto autor do atentado contra a casa consistorial do municipio lucense de Baralla, perpetrado o mércores.
Segundo o delegado do Goberno, a detencións de membros desta banda cos explosivos na man ou facendo pases duns a outros "en circunstancias incontestables" propiciaron que a xustiza se pronunciase "claramente no sentido de que se trata dunha organización terrorista".
"Toda a contorna que teñen este tipo de organizacións viuse moi debilitado porque claramente a colaboración cunha banda terrorista é delito", tamén a súa pertenza, salientou Juárez, que engadiu que "estamos a ver como está a haber unha debilidade obvia" da mesma, con dificultades "para recrutar novos compoñentes".
Onte a Garda Civil localizou un zulo na localidade coruñesa do Predouzo onde achou dúas bolsas de plástico que contiñan tres artefactos explosivos preparados para ser utilizados en accións similares ás do Concello de Baralla e que foron desactivados.
Preguntado pola resposta política en Galicia ante este tipo de atentados, o delegado do Goberno indicou que non cre que ningún grupo do arco parlamentario "ampare este tipo de accións", aínda que aclarou que "a falta dunha clara unanimidade política para condenar este tipo de accións sen paliativos, sen ningún tipo de peros nin explicación posterior, é triste".
Na súa opinión, esta actitude a mentes "retorcidas que lles dá por pór bombas dálles certa lexitimidade" e por iso "hai que ser máis claros, non se pode xogar a facer política", instou.
Juárez fixo un chamamento a que no futuro "non se perciban ambigüidades que se poidan malinterpretar".
Juárez asegura que Resistencia Galega está ''sumamente debilitada''
