A Audiencia provincial da Coruña denegou unha nova petición de liberdade dos pais de Asunta, a menor achada morta o 21 de setembro de 2013, que se atopan recluídos na prisión de Teixeiro en espera de xuízo, informou hoxe o Tribunal Superior de Xustiza de Galicia. Fontes do citado órgano xudicial indicaron que o tribunal considera que hai "indicios racionais de criminalidade" e un "evidente risco de fuga".
Por iso, o auto sinala que a situación de prisión provisional do avogada Rosario Porto e o xornalista Alfonso Basterra é "necesaria, proporcionada e responde ao fin de asegurar a presenza" dos acusados no xuízo.
"As dilacións que está a sufrir o procedemento son unicamente imputables á dirección letrada das partes que, no exercicio do lexítimo dereito de defensa, fan uso de recursos que producen efectos suspensivos", segundo o auto.
Asunta Basterra Porto morreu de forma violenta o 21 de setembro de 2013, e o seu tráxico desenlace supuxo un caso sen precedentes na historia criminal de España, ao estar acusados dun delito de asasinato os seus propios pais, que se atopan detidos en réxime de prisión provisional comunicada e sen fianza.
