A elección de José Ramón Gómez Besteiro como senador por designación autonómica non é tan segura como parecía. A falta de acordo entre populares e socialistas durante a reunión celebrada este venres para renovar os membros de varias institucións autonómicas podería facer perigar o nomeamento do líder do PSdeG, que quedou aprazado.
Así o solicitou o PPdeG, que tamén pediu un adiamento no nomeamento dos novos integrantes do Consello de Contas, o asunto polo comezaron as discordancias entre os dous grupos parlamentarios.
O conflito iniciouse coa decisión do PPdeG de vetar o nome do exdeputado socialista Xaquín Fernández Leiceaga, profesor universitario de Economía Aplicada na USC, como membro do Consello de Contas, alegando obxeccións co seu pasado político.
O grupo maioritario sinala nun escrito que o PPdeG "non bloquea en absoluto" a designación do secretario xeral dos socialistas galegos como senador, "senón que solicita o adiamento polo incumprimento do grupo socialista de non propor para o Consello de Contas a persoas relacionadas con formacións políticas", en referencia a Xaquín Fernández Leiceaga, que era a proposta socialista.
O grupo do PPdeG considera "significativo que logo de meses esperando chegar a un acordo cos socialistas para a renovación das vacantes nos órganos estatutarios, sexa agora, cando o PSOE decida chegar a un acordo no que se inclúa a designación do senador en representación da comunidade galega".
Insiste en que "o grupo socialista propuxo os nomes de persoas de recoñecida valía profesional, pero que incumprían o requisito previamente pactado entre ambos os grupos".
Ademais, afirma que quere "deixar claro que non existe bloqueo algún" á designación de Gómez Besteiro como senador, e insiste en que a solicitude de adiamento débese ao "incumprimento" socialista, ao propor para o Consello de Contas ao exportavoz parlamentario do propio grupo.
POSTURA SOCIALISTA. Pola súa banda, fontes socialistas consideraron "surrealista" esta decisión e afirmaron que o "veto" ao seu candidato procede directamente de Núñez Feijóo, nunha "rabecha contra Besteiro".
Agregaron que o perfil de Fernández Leiceaga é tan profesional como o do candidato do grupo maioritario José Antonio Redondo, ambos os dous profesores universitarios.
En calquera caso, comentaron que o acordo é necesario para o Consello de Contas, para o que os socialistas -resaltou- estiveron dispostos a discutir ata o último momento, e incluso expor un adiamento, pero engadiron que non é o mesmo caso o do senador por designación autonómica, pois se trátase dunha praza socialista que quedou vacante e correspóndelle ao grupo cubrila, sen decisión doutro grupo.
CASOS SIMILARES. "Feijóo vetou a Leiceaga", reiterou un portavoz socialista, que subliñou que se trata dunha situación que non ten antecedentes na historia da Autonomía e resaltou que Fernández Leiceaga é un militante de base do PSdeG, sen cargo orgánico algún, cunha "traxectoria similar" á de Redondo, proposto polo PPdeG, de quen recordou os seus cargos na administración baixo Goberno deste partido.
O Parlamento debe cubrir tres prazas, unha polo falecemento do último conselleiro maior, Luciano Fariña, e dous por dimisión dun membro e vencemento do mandato, hai xa meses, doutro dos integrantes deste organismo de control.
Destas tres prazas, dúas corresponden ao grupo maioritario e unha ao socialista.
