O presidente da Federación Galega de Municipios e Provincias (Fegamp), o socialista Carlos Fernández, asegurou hoxe que non queren "frear nin evitar" a futura Lei de Servizos Sociais, á que dirixiron duras críticas durante os pasados días, senón que pretenden que "respecte a autonomía local" e sexa "máis acordada" cos concellos.
Fernández informou de que a Comisión Galega de Cooperación Local, que se reuniu esta mañá, acordou pospor o informe sobre esta nova normativa, que elabora a Vicepresidencia da Xunta, e abrir un período de negociación coa Fegamp ata o próximo 27 de febreiro.
Esta petición para que "quedase pendente o ditame e se abrise unha negociación" cos concellos foi reclamada ao vicepresidente da Xunta, Anxo Quintana, nunha carta polo propio Fernández "hai días".
O tamén alcalde de Ames aclarou que desde a agrupación de concellos a intención non foi "nunca cuestionar a necesidade e pertinencia" dunha lei sobre servizos sociais, logo de 15 anos coa mesma normativa, pero insistiu en que debe de respectar a autonomía local e ser acordada a nivel municipal.
Vivenda
Fernández tamén se referiu ao conflito xurdido pola oposición dos concellos á Lei de Vivenda e aclarou que son "para a que está por vir" non ao proxecto que foi aprobado onte no Consello da Xunta de Medidas Urxentes en Materia de Vivenda e Solo.
Explicou que a este proxecto de lei presentáronse no seu momento "algunhas alegacións", pero que "parece ser que foron recollidas no seu maior parte", polo que non teñen ningunha crítica respecto diso, aínda que están "pendentes de ter o texto definitivo" que obtivo o visto e prace da Xunta.
Ademais, o presidente da Fegamp puntualizou que a agrupación Auriga, a rede de cidades intermedias conformada por varios concellos do PSdeG, non é unha cuestión partidista, senón unha asociación fundamentalmente "para presentarse a proxectos europeos".
A Fegamp pide consenso para a Lei de Servizos Sociais
