A unión das cooperativas Feiraco, Os Irmandiños e Melisanto, que busca ser un grupo lácteo de referencia en Galicia, chamarase Cooperativas Lácteas Unidas (Clun). Este proxecto, do que se desvinculou a cooperativa Xallas –tras decidilo en asemblea– rexistrarase en decembro como cooperativa de segundo grao e mantense a data do 1 de xaneiro para comezar o seu funcionamento, nun proxecto que suporá ao redor do 15% da produción láctea galega.
Diso informou en declaracións aos medios o presidente de Os Irmandiños, José Angel Blanco, tras unha reunión en Santiago destas cooperativas co presidente da Xunta, Alberto Núñez Feijóo, e os conselleiros de Medio Rural e Economía, Ángeles Vázquez e Francisco Conde.
Así, os seus produtos comercializaranse baixo as marcas Feiraco, Feiraco Unicla e Clesa, "desenvolvendo isto que se ten". "Logo, a medida que vaiamos crecendo, incrementando máis negocios, sempre o que pretendemos é unha empresa máis forte que defenda mellor os intereses dos nosos gandeiros", agregou. Respecto diso, destaca que se está traballando para "integrar todo o que teñen as cooperativas", de forma que se poidan unir sinerxías como servizos a gandeiros.
APOIO "TOTAL" DA XUNTA. A preguntas da prensa sobre se cren necesaria a axuda económica da Xunta para o seu proxecto, Blanco indica que calquera apoio é "interesante". "Pero agora mesmo non estamos a pensar niso", senón en comezar a funcionar, e "cando se teñan proxectos a desenvolver" presentaranllos ao Goberno galego para optar a eles.
Ademais, deixa claro que reciben un apoio "total" por parte da Consellería de Medio Rural para levar a cabo o seu proxecto e, "por suposto", que ven comprometido con iso ao presidente da Xunta, Alberto Núñez Feijóo.
Nesta liña, a conselleira de Medio Rural, Ángeles Vázquez, recordou que "non é a primeira reunión" das cooperativas co presidente, á vez que valorou que esta unión "é simplemente o comezo" para "un futuro" de "articulación do sector", con "mellores servizos a mellor prezo" para os produtores. "Non veñen pedir axuda, se non a presentar o seu proxecto", apostilou Ángeles Vázquez, antes de recordar que esta unión "non a impulsa a administración", senón os gandeiros que "decidiron que teñen que unirse para ser máis competitivos".
MÁS DE 3.500 GANDEIROS. A continuación, a conselleira indicou que o importante "non é só a canto se vende o leite", senón "canto costa", e como se poden reducir os custos de produción para incrementar os beneficios, como busca este proxecto que agrupa a "máis de 3.500 gandeiros".
Finalmente, subliñou a "sensatez" que avala esta posta en marcha de Cooperativas Lácteas Unidas, tras dous anos de estudos de mercado, á vez que apelou a "seguir traballando".
A cooperativa láctea que aspira a liderar Galicia chamarase Clun
A Xunta ofrece o seu apoio "total" ao proxecto de Feiraco, Os Irmandiños e Melisanto
