A choiva leva a calma aos montes de Galicia

Os incendios forestais rexistrados no municipio de Cervantes, en Lugo, e no concello ourensán da Pobra de Trives quedaron extinguidos na tarde deste mércores. Ademais, os equipos de loita contra o lume lograron tamén sufocar nas últimas horas o de Lalín, en Pontevedra, e o de Melón, en Ourense, segundo a Consellería do Medio Rural.

Desde as 7.04 horas do martes permanecía controlado o lume que se declarou ás 21.05 horas do domingo na parroquia de San Tomé en Cervantes. Este lume queimou unhas 46 hectáreas, das cales 36 son arboredos e nove de monte raso. Para a súa extinción foron mobilizados 19 axentes, 54 brigadas, 24 motobombas, unha pa e seis helicópteros.

Tamén desde as 22.15 horas do martes seguía controlado o lume que comezou ás 18.24 horas do domingo na parroquia de Navea, na Pobra de Trives. Este incendio, sufocado ás 19.15 deste mércores, arrasou unhas 194 hectáreas, das cales 174 son de monte raso e as outras 20 de arboledo. Na súa extinción colaboraron dous técnicos, 13 axentes, 44 brigadas, 17 motobombas, unha pa, sete helicópteros e dous avións. Tamén participaron efectivos da Unidade Militar de Urxencia (Ume).

Con anterioridade quedara extinguido, ás 23.20 horas do martes, o lume rexistrado ás 17.02 horas do mesmo día na parroquia de Vilanova, no municipio de Lalín. Medio Rural sinalou que arderon 24 hectáreas, das cales 20 son de monte raso e outros catro arboredos. Na súa extinción traballaron tres axentes, 15 brigadas, sete motobombas, dúas pas, seis helicópteros e tres avións.

Ás 11.15 horas deste mércores tamén se deu por apagado o incendio de Melón, en Quins, que arrincou o domingo ás 23.20 horas. As últimas estimacións sitúan a superficie afectada en 101,11 hectáreas, das cales 82,15 foron de raso e as 18,96 restantes de arboledo. Para a extinción deste lume foron mobilizados tres técnicos, 15 axentes, 54 brigadas, 18 motobombas, dúas pas, sete helicópteros e tres avións.